Ոստիկանությունն այլևս չի օգտագործելու լուսաձայնային նռնակները խաղաղ ցուցարարների նկատմամբ. Ալեն Սիմոնյան
1 րոպեի ընթերցում
ԵՐԵՎԱՆ,8 ՀՈՒՆԻՍԻ, ԱՐՄԵՆՊՐԵՍ: Ազգային Ժողովի «Ելք» խմբակցության պատգամավոր Ալեն Սիմոնյանը հանդիպում է ունեցել ՀՀ ոստիկանապետ Վալերիյ Օսիպյանի հետ:
Ինչպես տեղեկացնում է «Արմենպրես»-ը, ՀՀ ԱԺ պատգմավորն իր ֆեյսբուքյան էջում տեղադրված տեսաուղերձում նշել է, թե ոստիկանապետի հետ երկար քննարկումներից հետո եկել են համաձայնության, որ ՀՀ ոստիկանությունը այլևս չի օգտագործելու խաղաղ ցուցարարների ուղղությամբ լուսաձայնային նռնակներ:
«Ես հանդիպում եմ ունեցել ՀՀ ոստիկանապետ Վալերիյ Օսիպյանի հետ և երկար քննարկումներից հետո եկել ենք համաձայնության, ըստ որի լուսաձայնային նռնակները Ոստիկանության կողմից այլևս չեն օգտագործվելու խաղաղ ցուցարարների ուղղությամբ»,- ասել է Ալեն Սիմոնյանը:
Նրա խոսքով` նախկինում օգտագործված լուսաձայնային նռնակները զգալի մարմնական վնասվածքներ են պատճառել ցուցարարներին և նույնիսկ հաշմանդամության պատճառ հանդիսացել: