3 րոպեի ընթերցում
ԵՐԵՎԱՆ, 5 ՄԱՅԻՍԻ, ԱՐՄԵՆՊՐԵՍ: Հայաստանի Հանրապետության առաջին նախագահ Լևոն Տեր-Պետրոսյանը հերթական անգամ անդրադարձել է կուսակցությունների կողմից պատգամավորական մանդատից հրաժարվելու պարտադրանքի խնդրին: Ինչպես հաղորդում է «Արմենպրես»-ը, առաջին նախագահն անդրադարձել է Ազգային ժողովի ՀՅԴ խմբակցության ղեկավար Արմեն Ռուստամյանի հայտարարությանը, թե պատգամավորն իրավունք ունի առաջնորդվել իր խղճով և համոզմունքով, բայց Դաշնակցությունն ունի իր ավանդույթը, և այդ կուսակցության հետ ոչ ոք չի կարող խաղեր տալ:
«Այսինքն, Սահմանադրությունը` սահմանադրություն, բայց իրենց համար դա որևէ նշանակություն չունի, քանի որ սա Դաշնակցությունն է, որն առաջնորդվում է ոչ թե Սահմանադրությամբ, այլ սեփական ավանդույթով և կանոնադրությամբ: Մի խոսքով, Դաշնակցության համար իրենց ավանդույթն ու կանոնադրությունը վեր է Հայաստանի Սահմանադրությունից, որի ընդունման նախաձեռնողներից ու ջատագովներից մեկը հենց ինքն է եղել ու այդ Սահմանադրությամբ հաստատված ընթացակարգով հայտնվել Ազգային Ժողովում: Ավելի պարզ ասած` Դաշնակցությունը թքած ունի Հայաստանի Սահմանադրության վրա: Ի դեպ, նույնը վերաբերում է նաև Հանրապետական կուսակցությանը` իր պատգամավորներին հրաժարական պարտադրելու նույնօրինակ վարքի պատճառով: Թեև, ինչպես իմ նախորդ դիտարկման մեջ ես նշել էի, որ Հայաստանի բուռն իրադարձությունների ներկայիս փուլում իմ բարձրացրած հարցը կարող է մանրուք թվալ, շարունակում եմ պնդել, որ դա ամենևին մանրուք չէ, այլ իրավական պետության կայացման կարևորագույն պայման»,- ilur.am-ում տպագրված հոդվածում նշել է Տեր-Պետրոսյանը:
ՀՀ առաջին նախագահը դիմել է Ազգային ժողովի բոլոր պատգամավորներին և անձամբ ԱԺ նախագահ Արա Բաբլոյանին, որպեսզի հորդորեն հրաժարական ներկայացրած պատգամավորներին ետ վերցնել իրենց դիմումները, քանի որ նրանք այդ քայլը կատարել են ոչ թե ինքնակամ, այլ իրենց կուսակցությունների պարտադրանքով: Նրա գնահատմամբ` եթե դա չարվի, կնշանակի, որ Սահմանադրությունը խախտել են ոչ միայն նշված կուսակցությունները, այլ նաև Ազգային ժողովի բոլոր պատգամավորները: «Անթույլատրելի է, որ «Նոր Հայաստանն» իր գործունեությունն սկսի հակասահմանադրական առաջին իսկ քայլով: Դրանում իրենց հերթին եւ առավելապես պետք է շահագրգռված լինեն նաեւ ընթացիկ քաղաքական շարժման ղեկավարությունը և անձամբ Նիկոլ Փաշինյանը»,- եզրափակում է Լևոն Տեր Պետրոսյանը:
ՀՅԴ ԳՄ-ն ԱԺ ՀՅԴ խմբակցության պատգամավոր Աղվան Վարդանյանին պարտադրել է վայր դնել պատգամավորական մանդատը, քանի որ վերջինս չէր մասնակցել մայիսի 1-ին վարչապետի պաշտոնում Նիկոլ Փաշինյանի ընտրության քվեարկությանն այն դեպքում, երբ ՀՅԴ-ն կողմ քվեարկելու որոշում ուներ: Աղվան Վարդանյանը հրաժարվել է մանդատից, ինչից հետո նրան հեռացրել են նաև կուսակցությունից: Մինչ խորհրդարանում վարչապետի ընտրության հարցի քննարկումը պատգամավորական մանդատից հրաժարվելու դիմում էր ներկայացրել ՀՀԿ խմբակցության պատգամավոր Գրիգոր Ավալյանը: