1 րոպեի ընթերցում
ԵՐԵՎԱՆ, 6 ՀՈՒԼԻՍԻ, ԱՐՄԵՆՊՐԵՍ: Սիրիայում լարված իրավիճակը շարունակվում է հատկապես թուրք-սիրիական եւ լիբանանա-սիրիական սահմաններում:Ինչպես«Արմենպրես»-ին տեղեկացրեց սիրիահայ համայնքի ներկայացուցիչ Նազարեթ Էլմաջյանը, զինված խմբավորումները կրկին ներխուժել են սիրիական տարածքներ: Խմբավորումները հիմնականում Լիբիայից, Եգիպտոսից եւ Սաուդյան Արաբիայից են:
Տեղեկություններ են ստացվել նաեւ այն մասին, որ սիրիական բանակի եւ զինյալների միջեւ բախումների արդյունքում մեծ թվով զոհեր կան, որոնցից շատերի ինքնությունը մնում է անհայտ: Զոհվածների մոտ չկան ինքնությունը հաստատող փաստաթղթեր: Սիրիայի հիվանդանոցները լեփ-լեցուն են անհայտ օտարազգի դիակներով: Սա վկայում է այն մասին, որ զինյալների մեծամասնությունը սիրիացիներ չեն:
Էլմաջյանի խոսքով` Դամասկոսում իրավիճակն այժմ հանգիստ է, բարեբախտաբար զոհվածների թվում հայկական համայնքի ներկայացուցիչներ չկան:
Նշվել էր, որ հուլիսի 6-ինմայրաքաղաք Դամասկոսի տարբեր մասերում հրաձգություն է լսվում: