Ն.Ս.Օ.Տ.Տ. Գարեգին Բ Ամենայն Հայոց եւ Մեծի տանն Կիլիկիո Արամ Ա կաթողիկոսներն այսօր այցելեցին Ծիծեռնակաբերդի հուշահամալիր եւ Հայոց ցեղասպանության թանգարան-ինստիտուտ
1 րոպեի ընթերցում
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ (թղթ. Էլլադա Ղուկասյան): Ն.Ս.Օ.Տ.Տ. Գարեգին Բ Ամենայն Հայոց կաթողիկոսը եւ Մեծի տանն Կիլիկիո Արամ Ա կաթողիկոսն այսօր այցելեցին Ծիծեռնակաբերդի հուշահամալիր եւ Հայոց ցեղասպանության թանգարան-ինստիտուտ: Վեհափառները ծաղկեպսակներ դրեցին հուշահամալիրի մոտ եւ հոգեւոր արարողություն կատարեցին ի հիշատակ Եղեռնի նահատակների: Հոգեւոր առաջնորդները շրջայց կատարեցին Ցեղասպանության թանգարանում: Թանգարանի տնօրեն Հայկ Դեմոյանը նրանց ներկայացրեց նոր ցուցանմուշները: Հ. Դեմոյանը լրագրողներին ասաց, որ հովվապետերի հետ խոսել է նաեւ հետագա ծրագրերի մասին` կապված Եղեռնի հուշարձանի տարածքում մատուռի կառուցման հետ: Նշենք, որ թանգարանի ýոնդային բաժնում պահպանվում են մասունքներ` բերված Դեր Զորից, եւ ապրիլի 24-ի միջոցառումներից մեկն էլ կլինի հատուկ արարողակարգով դրանք հողին հանձնելը. մատուռը կկառուցվի մասունքների վրա: Թանգարանի տնօրենը նշեց, որ հուշաքարն արդեն տեղադրված է, հետագա քննարկումների արդյունքում կորոշվի մատուռի հստակ տեղը եւ ճարտարապետական լուծումները: