1 րոպեի ընթերցում
Արմավիրի մարզի Ջրառատ համայնքում գտնվող Սպորտի կառավարման կենտրոնի Սիմոն Մարտիրոսյանի անվան ծանրամարտի մարզադպրոցում հուլիսի 23-25-ը անցկացվել է Հայաստանի ծանրամարտի 2026 թվականի երիտասարդների առաջնությունը, որտեղ հաջող ելույթ են ունեցել սևանցի ծանրորդներ Ալինա Սուքիասյանը և Հովհաննես Հովհաննիսյանը։
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, 77 կգ քաշային կարգում սևանցի ծանրորդ, մարզիչ Գառնիկ Աբրահամյանի սան Ալինա Սուքիասյանը երկամարտի 223 կգ արդյունքով դարձել է Հայաստանի երիտասարդների առաջնության չեմպիոն։
Տղաների պայքարում 75 կգ քաշային կարգում արծաթե մեդալ է նվաճել բազմիցս միջազգային մրցաշարերում Հայաստանը պատվով ներկայացրած Հովհաննես Հովհաննիսյանը՝ երկամարտում գրանցելով 288 կգ արդյունք։
«Շնորհավորում ենք մեր մրցանակակիրներին, նրանց մարզչին, Ն. Դագարյանի անվան մանկապատանեկան մարզադպրոցի տնօրինությանը և աշխատակազմին։ Այս և նախորդ նվաճումները հետևողական, նպատակասլաց աշխատանքի և հաղթանակի կամքի արդյունք են։ Սևան համայնքը հպարտությամբ ու մեծարանքով է ընդունում իր շնորհալի մարզիկներին, որոնք շարունակում են նոր հաղթանակներ կերտել»,- նշել են Սևանի համայնքապետարանի աշխատակազմից։