«Պետք է անենք ամեն բան, որպեսզի նոր ճակատ չբացվի». Զելենսկին անդրադարձել է Թեհրանի սպառնալիքներին

Ուկրաինայի նախագահ Վոլոդիմիր Զելենսկին մեկնաբանել է Կասպից ծովում իրանական նավին ուկրաինական հարվածից հետո Թեհրանից հնչած այն սպառնալիքները, որ այդ հարձակումն անպատասխան չի մնա:

«Արմենպրես»-ի փոխանցմամբ՝ Sky News-ի հետ հարցազրույցում Զելենսկին հայտարարել է, որ ռուս-ուկրաինական պատերազմի սկզբից ի վեր Իրանը նոր տեխնոլոգիաներ և անօդաչու թռչող սարքեր է մատակարարել Ռուսաստանին, այնուհետև նրանց տվել է դրանց արտադրության լիցենզիաներ:

«Նրանք հարձակվե՞լ են մեզ վրա: Կարծում եմ՝ այո: Այնպես որ, նրանք արդեն արել են դա», - ասել է նա՝ ի պատասխան լրագրողի հարցին՝ արդյոք Կիևը չի անհանգստանում, որ Իրանը կհարձակվի Ուկրաինայի վրա:

Զելենսկին հավելել է, որ հարկավոր է թույլ չտալ, որ նոր ճակատ բացվի:

«Մենք պետք է զգույշ լինենք: Մենք պետք է անենք ամեն բան, որպեսզի ոչ մի դեպքում նոր ճակատ չբացվի։ Բայց մենք պետք է ազնիվ լինենք՝ Իրանը և Հյուսիսային Կորեան արդեն հարձակվել են մեզ վրա», - նշել է նա:

Ուկրաինայի նախագահը հույս է հայտնել, որ այդ հարձակումները չեն ընդլայնվի, միևնույն ժամանակ նշելով, որ պետք է պատրաստ լինել, քանի որ պատերազմի հենց սկզբից, նրա խոսքով, Հյուսիսային Կորեան և Իրանը ռազմական աջակցություն են ցուցաբերում Ռուսաստանին՝ առանց Կիևի կողմից որևէ էսկալացիայի:

Հուլիսի 25-ին Կասպից ծովում ուկրաինական զինված ուժերի կողմից հարձակման է ենթարկվել իրանական առևտրային նավ: Հարվածի հետևանքով 1 նավաստի զոհվել է, մի քանիսը՝ վիրավորվել: Իրանցի պաշտոնյաները հայտնել են, որ երկաթով բեռնված նավը Ռուսաստանի Աստրախան քաղաքից ուղևորվում էր իրանական Անզալի։ Իրանի արտգործնախարարությունը խստորեն դատապարտել է հարձակումը և կանչել Ուկրաինայի գործերի ժամանակավոր հավատարմատարին։ Գերատեսչությունն այս միջադեպը որակել է որպես «թշնամական և հանցավոր գործողություն»՝ շեշտելով, որ սա արտացոլում է «Կիևի թշնամական վերաբերմունքն Իրանի նկատմամբ»։