2 րոպեի ընթերցում
Եվրոպան պետք է գոյություն ունենա պատմական ու աշխարհագրական, ոչ թե միայն ինստիտուցիոնալ շրջանակներում: Ու Հայաստանը հենց եվրոպական պատմություն ունի:
«Արմենպրես»-ի հաղորդմամբ՝ ՀՀ վարչապետ Նիկոլ Փաշինյանի հետ հանդիպումից հետո կայացած մամուլի ասուլիսի ժամանակ այս մասին հայտարարել է Ֆրանսիայի նախագահ Էմանուել Մակրոնը՝ պատասխանելով ԵՄ ինտեգրման ու մեծ Եվրոպայի մաս դառնալու Հայաստանի հեռանկարների մասին լրագրողի հարցին:
«Բնականաբար, ԵՄ-ն կարևոր դեր է խաղում, երբ խոսում ենք Եվրոպայի մասին՝ իր հզորությամբ, իր բարդությամբ, իր ինտեգրացիայի աստիճանով: Բայց դրանով ամեն ինչ չի սահմանափակվում: Եվրոպան նաև աշխարհագրություն է, պատմություն, քաղաքակրթություն: Կարող ենք արձանագրել, որ Հայաստանը հենց եվրոպական պատմություն ունի: Եվ եվրոպական քաղաքական համայնքը հենց այդ մեծ Եվրոպայի ճանաչումն է», - ասաց Ֆրանսիայի նախագահը:
Նրա խոսքով՝ էականն այստեղ ընդհանուր հիմքեր կառուցելն է: Մակրոնը համոզմունք հայտնեց, որ երբ խոսք է գնում պաշտպանության, անվտանգության, թրաֆիքինգի դեմ պայքարի, էներգետիկայի ու ժողովրդավարական տարածաշրջանների պաշտպանության մասին, հենց դրանում է եվրոպական համայնքի ամբողջ այդ իմաստը:
«Թե եվրոպական, թե հարավկովկասյան տարածաշրջանները նախկինում դարձել են կայսրությունների զոհ: ԵՄ կառուցմամբ Արևմտյան Եվրոպան կարծես իմունիտետ ձեռք բերեց այդ ամենի դեմ, իսկ 90-ականներից դրան միացան նաև Կենտրոնական Եվրոպայի երկրները: Ու այժմ սա ընդհանուր էմանսիպացիա է: Արդյո՞ք պետք է անպայման լինի ինտեգրում կամ ԵՄ ընդլայնում: Դա կախված է յուրաքանչյուր երկրի ընտրությունից: Սա շատ պահանջկոտ պրոցես է: Ես վստահ եմ, որ մենք չպետք է սպասենք դրան: Այսինքն, հենց այս պահից, հաշվի առնելով աշխարհում իրավիճակը, պետք է գործել: Եվ հենց այդպես էլ մենք արեցինք վերջին տարիներին: Մենք կառուցեցինք մեծ Եվրոպան, և Հայաստանը մեզ հետ անցել է հենց այս ճանապարհը: Եվրոպական ապագան Հայաստանի համար միակն է, որ կարող է երաշխավորել խաղաղություն և հավասարակշռություն: Եվրոպան դա ընդհանուր ծրագիր է», - եզրափակեց Մակրոնը: