2 րոպեի ընթերցում
The 8th European Political Community (EPC) Summit. Yerevan, Armenia. May 4, 2026.
Եվրոպական խորհրդի նախագահ Անտոնիու Կոշտան վստահ է, որ Եվրոպական քաղաքական համայնքի երևանյան գագաթնաժողովը ցույց է տալիս, որ Եվրոպայի աշխատաոճը դիվանագիտությունն է, բազմակողմանիությունը և հարգանքը միջազգային իրավունքի նկատմամբ, ինչն էլ նպաստում է խաղաղությանը։
«Արմենպրես»-ի հաղորդմամբ՝ Եվրոպական քաղաքական համայնքի գագաթնաժողովից հետո ամփոփիչ հայտարարության ժամանակ Կոշտան նշել է, որ ցանկացած քննարկում, որը վերաբերվում է խաղաղությանն ու կայունությանն այս աշխարհամասում, պետք է ընդգրկի Եվրոպայի սահմաններից դուրս համախոհ գործընկերներին։
«Այս գագաթնաժողովը կհիշվի որպես խաղաղության գագաթնաժողով Կովկասում, որը բերել են խիզախ քաղաքական որոշումները և անխոնջ դիվանագիտական ջանքերը։ Սա պատմական իրադարձություն է մի աշխարհում, որտեղ էսկալացիաները և պատերազմը կարծես թե գերակայում են»,-ասել է նա:
«Եվրոպան համակողմանիորեն պետք է աշխատի Հայաստանի և տարածաշրջանի հետ՝ ապահովելու խաղաղություն և կայունություն։ Այն փաստը, որ Հայաստանը հյուրընկալում է գագաթնաժողովը, և այն փաստը, որ մենք բոլորս այստեղ ենք, բավականին հստակ ցույց է տալիս Հայաստանի աշխարհաքաղաքական ուղղությունը, և Հայաստանն ու Եվրամիությունը միասին են այս ճանապարհին»,- նշել է Կոշտան։ Նրա խոսքով՝ գագաթնաժողովը շեշտադրում է պայքարը օտարերկրյա միջամտությունների դեմ և ընդգծում փոխկապակցվածության ուժը՝ ստեղծելու փոխշահավետ տնտեսական գործընկերային հարաբերություններ։
Եվրոպական խորհրդի նախագահը շնորհակալություն է հայտնել վարչապետ Նիկոլ Փաշինյանին հյուրընկալության համար և հույս հայտնել, որ հաջորդ տարի Իռլանդիայում կայանալիք գագաթնաժողովը նույնքան հաջողված կլինի։