Հայաստանը շարունակում է առաջ մղել տարածաշրջանային կայունության և կապերի ընդլայնման նախաձեռնությունները․ վարչապետ

Հայաստանի վարչապետ Նիկոլ Փաշինյանը Եվրոպական քաղաքական համայնքի 8-րդ գագաթնաժողովի արդյունքներով համատեղ հայտարարության շրջանակում ամփոփել է քննարկումների հիմնական ուղղությունները։

«Ուրախ եմ տեղեկացնել, որ այսօր Երևանում հաջողությամբ ավարտվեց Եվրոպական քաղաքական համայնքի 8-րդ գագաթնաժողովը, որը համախմբեց առաջնորդների ամբողջ մայրցամաքից և նրա սահմաններից դուրս»,-«Արմենպրես»-ի հաղորդմամբ՝ ասել է վարչապետը։

Նա շնորհակալություն է հայտնել Եվրոպական միությանը և գործընկերներին համաժողովի կազմակերպման համար։

«Կցանկանայի օգտվել այս հնարավորությունից՝ իմ անկեղծ երախտագիտությունը հայտնելու Եվրոպական միությանը՝ գագաթնաժողովի համատեղ կազմակերպման գործում սերտ համագործակցության և գործընկերության համար, ինչպես նաև մայրցամաքից դուրս գտնվող գործընկերներին՝ այս ձևաչափի աշխարհագրությունն ընդլայնելու համար»,-նշել է նա։

Փաշինյանը նաև անդրադարձել է տարածաշրջանային գործընթացներին։ 

«Ցանկանում եմ ընդգծել Ադրբեջանի նախագահի հեռավար մասնակցությունը և Թուրքիայի փոխնախագահի ներկայությունը՝ խաղաղ գործընթացի և տարածաշրջանային համագործակցության համատեքստում»,– ասել է վարչապետը։

Նրա խոսքով՝ քննարկումները հաստատել են երկխոսության անհրաժեշտությունը։

«Այսօրվա քննարկումները հաստատեցին, որ աշխարհում աճող մարտահրավերների պայմաններում առկա է անկեղծ երկխոսության և գործնական որոշումների անհրաժեշտություն՝ բոլոր տարածաշրջաններում խաղաղության և կայունության ամրապնդման համար»,– նշել է նա՝ հավելելով, որ ուշադրության կենտրոնում են եղել անվտանգությունը, փոխկապակցվածությունը, տարածաշրջանային համագործակցությունը, տնտեսության կայունությունը, էներգետիկան և անցումը կանաչ էներգետիկային։

Վարչապետը շեշտել է փոխկապակցվածության կարևորությունը։         

«Փոխկապակցվածությունը կենտրոնական նշանակություն ունի մայրցամաքում տնտեսական անվտանգության, կայունության և երկարաժամկետ կայունության համար»,– ասել է նա՝ ընդգծելով, որ կլիմայական և էներգետիկ նպատակների առաջխաղացման համատեքստում փոխկապակցվածության ամրապնդումը ճանաչվել է որպես ընդհանուր առաջնահերթություն։

Անդրադառնալով Հարավային Կովկասին՝ Փաշինյանը նշել է, որ այս համատեքստում անդրադարձել են նաև տարածաշրջանում խաղաղության և կայունության առաջմղման կարևորությանը։ «Կայուն խաղաղությունը, հարաբերությունների կարգավորումը և սահմանների բացումը օգուտ կբերեն ոչ միայն տարածաշրջանին, այլև կամրապնդեն կապերն ու համագործակցությունը Եվրոպական ավելի լայն տարածքում և նրա սահմաններից դուրս»,- նշել է Փաշինյանը։

Նա հավելել է, որ քննարկվել է նաև հիբրիդային սպառնալիքների թեման։

«Այսօր մենք նաև քննարկել ենք, թե ինչպես պետք է ժողովրդավարական երկրները պայքարեն հիբրիդային սպառնալիքների դեմ»,– ասել է վարչապետը։

Փաշինյանի խոսքով՝ Հայաստանը շարունակելու է իր նախաձեռնությունները տարածաշրջանում։

«Հայաստանը շարունակում է առաջ մղել նախաձեռնությունները, որոնք ուղղված են ներառական կապերի ընդլայնմանը և ավելի լայն տարածաշրջանում կայունության ամրապնդմանը»,-ասել է նա։

Վարչապետը նշել է, որ գագաթնաժողովը վերահաստատել է ձևաչափի նշանակությունը։

«Գագաթնաժողովը վերահաստատեց, որ Եվրոպական քաղաքական համայնքը ոչ միայն երկխոսության ձևաչափ է, այլև հարթակ՝ վստահության ամրապնդման և համախոհ գործընկերների հետ ավելի համակարգված և հեռատես եվրոպական օրակարգ ձևավորելու համար»,-ընդգծել է նա։

Փաշինյանը վստահություն է հայտնել, որ Երևանում անցկացված քննարկումները շարունակական ազդեցություն կունենան։

«Վստահ եմ, որ Երևանում քննարկումները դուրս կգան այս գագաթնաժողովի շրջանակներից՝ ձևավորելով մեր հետագա համագործակցությունն ու ընդհանուր ըմբռնումը մայրցամաքում»,-ասել է վարչապետը։

Ելույթի ավարտին նա հաջողություն է մաղթել Իռլանդիայի վարչապետին՝ որպես հաջորդ գագաթնաժողովի հյուրընկալող երկրի ղեկավարի։

«Կցանկանայի օգտվել այս հնարավորությունից՝ մաղթելով իմ սիրելի ընկերոջը՝ Իռլանդիայի վարչապետ Մարտինին՝ որպես Եվրոպական քաղաքական համայնքի գագաթնաժողովը հյուրընկալող հաջորդ երկրի ղեկավարի, ամենայն հաջողություն այս հզոր թափը և սիներգիան պահպանելու գործում»,-նշել է նա։

Վարչապետը նաև շնորհակալություն է հայտնել լրատվամիջոցներին և Եվրոպական խորհրդի նախագահին՝ գագաթնաժողովի անցկացմանն աջակցելու համար։