1 րոպեի ընթերցում
Լիբանանի հարավին հասցված Իսրայելի հարվածները, որոնց հետևանքով զոհվել է լրագրող Ամալ Խալիլը, ինչպես նաև փրկարար ծառայությունների մուտքը խոչընդոտելը պատերազմական հանցագործություններ են: Ինչպես հաղորդում է «Արմենպրես»-ը, այս մասին Լիբանանի վարչապետ Նավաֆ Սալամը գրել է X սոցցանցի իր էջում։
«Լրագրողների վրա գրոհները, նրանց մոտ փրկարար խմբերի մուտքը խոչընդոտելը, ինչպես նաև այդ ծառայությունների ժամանումից հետո նրանց գտնվելու վայրի վրա կրկնակի հարվածները պատերազմական հանցագործություններ են», - ասվում է Լիբանանի վարչապետի հաղորդագրության մեջ։
Նա նշել է, որ երկրի հարավում մասնագիտական պարտականությունները կատարելու ժամանակ լրագրողներին հարվածելն այլևս առանձին միջադեպեր չեն, այլ դարձել են կայուն պրակտիկա, որը Լիբանանը դատապարտում և մերժում է։
Սալամի խոսքով՝ Բեյրութը մտադիր է հասնել այս միջադեպերի միջազգային մակարդակով քննության և պատասխանատվության ենթարկել մեղավորներին։
Նա նաև ցավակցություն է հայտնել զոհված լրագրող Ամալ Խալիլի ընտանիքին, նրա գործընկերներին և Լիբանանի լրագրողական համայնքին՝ շուտափույթ ապաքինում մաղթելով վիրավորներին։