2 րոպեի ընթերցում
Իսլամական հեղափոխության պահապանների կորպուսը հայտնել է, որ իր հակաօդային պաշտպանության համակարգերը մարտի 19-ին հաջողությամբ հարվածել և մեծապես վնասել են ամերիկյան F-35 «ստելս» կործանիչը: «Արմենպրես»-ի փոխանցմամբ՝ այս մասին հաղորդում է Tehran Times-ը՝ նշելով, որ առաջին անգամ է հինգերորդ սերնդի այդ կործանիչը խոցվում հակառակորդի կրակից։
ԻՀՊԿ-ն հայտնել է, որ կործանիչը խոցվել է նոր առաջադեմ օդատիեզերական պաշտպանության համակարգով։ ԻՀՊԿ-ն նաև հրապարակել է խոցման տեսանյութը։
Ավելի վաղ CNN-ը, վկայակոչելով իր աղբյուրներին, հաղորդել էր, որ ամերիկյան գերժամանակակից F-35 կործանիչն արտակարգ վայրէջք է կատարել Մերձավոր Արևելքում գտնվող ԱՄՆ ավիաբազայում այն բանից հետո, երբ, ենթադրաբար, խոցվել է իրանական հակաօդային պաշտպանության ուժերի կողմից։ ԱՄՆ Կենտրոնական հրամանատարության խոսնակը հայտարարել է, որ ինքնաթիռը մարտական առաքելություն էր իրականացնում Իրանի երկնքում, երբ ստիպված է եղել արտակարգ վայրէջք կատարել։
Միջադեպին անդրադարձել է Իրանի խորհրդարանի խոսնակ Մոհամմադ Բաղեր Ղալիբաֆը X-ի իր էջում։ Նրա խոսքով՝ F-35-ը ոչ միայն կործանիչ էր, այլև «ԱՄՆ բանակի անհաղթելիության խորհրդանիշ», և ևս մեկ անգամ «մարտի դաշտի իրողություններն ուղղակիորեն բախվում են քաղաքական խոսույթների հետ»։