Իրանը նույնպես «չավարտված գործեր» ունի Իսրայելի հետ. Արաղչի

Իրանի արտաքին գործերի նախարար Աբբաս Արաղչին արձագանքել է Իսրայելի վարչապետ Բենիամին Նեթանյահուի հակաիրանական հռետորաբանությանը՝ նշելով, որ Իրանը նույնպես «չավարտված գործեր» ունի Իսրայելի հետ։ «Արմենպրես»-ի փոխանցմամբ՝ այս մասին Արաղչին նշել է X միկրոբլոգում գրառման մեջ։

«Նախորդ անգամ, երբ ցանկանում էիք «ավարտին հասցնել գործը», Իրանն ավելի հզորացավ։ Ցանկանո՞ւմ եք կրկին փորձել բախտը։ Խնդրեմ։ Բայց զգո՛ւյշ եղեք. մենք էլ ունենք չավարտված գործեր», - նշել է Արաղչին։

Նրա խոսքով՝ Նեթանյահուն ԱՄՆ-ին ներքաշում է հերթական պատերազմի մեջ «բանտից խուսափելու համար»՝ անկախ նրանից, թե ինչ հետևանքներ կունենա դա Իսրայելի և առավել ևս՝ ԱՄՆ նախագահի համար։

Ավելի վաղ ԱՄՆ նախագահ Դոնալդ Թրամփն իր աջակցությունն է հայտնել Իսրայելի վարչապետ Նեթանյահուին վերջինիս վերընտրվելու հարցում։ Նա բարձր է գնահատել Նեթանյահուի առաջնորդությունն Իրանի հետ հարաբերություններում՝ պնդելով, որ Իսրայելին ղեկավարի պաշտոնում անհրաժեշտ է հենց նրա մակարդակի գործիչ։

X սոցիալական հարթակում հրապարակված իր տեսաուղերձում Նեթանյահուն գովեստի խոսքեր է ուղղել ԱՄՆ նախագահին՝ Թեհրանում գործող, իր բնորոշմամբ, «այս ստոր, մարդասպան բռնապետության» կողմից հնչող սպառնալիքներին դիմակայելու համար՝ ընդգծելով Թրամփի անսասան դիրքորոշումը:

«Շնորհակալություն նախագահ Թրամփին՝ ընտրություններում ցուցաբերած հսկայական աջակցության համար։ Մենք միասին մեծ գործեր ենք արել, և միասին առաջիկա երկու տարիների ընթացքում կավարտենք մեր առաքելությունը՝ վերացնելով Իրանի միջուկային ծրագիրը», - նշել էր նա։

Իսրայելում խորհրդարանական ընտրությունները նախատեսված են հոկտեմբերի 27-ին։