2 րոպեի ընթերցում
Ռուսաստանի նախագահ Վլադիմիր Պուտինն Արաբական Միացյալ Էմիրությունների նախագահ Մուհամմադ բին Զայեդ ալ-Նահյանի հետ քննարկել է Իրանի դեմ Իսրայելի և ԱՄՆ-ի ռազմական գործողությունները։ «Արմենպրես»-ի փոխանցմամբ՝ այս մասին հայտնում է Կրեմլի մամուլի ծառայությունը։
«Առաջնորդները շարունակել են մտքերի փոխանակումը Մերձավոր Արևելքում վտանգավոր կերպով վատթարացող իրավիճակի վերաբերյալ, որը լուրջ հետևանքներ է ունենում ինչպես Իրանի, այնպես էլ արաբական երկրների համար։ Ռուսաստանի նախագահն ընդգծել է հակամարտության հետագա սրումը կանխելու և այն բանակցությունների միջոցով լուծելու անհրաժեշտությունը», - նշված է մամուլի հաղորդագրության մեջ։
Վլադիմիր Պուտինը շնորհակալություն է հայտնել ալ-Նահյանին ԱՄԷ-ում գտնվող բազմաթիվ ՌԴ քաղաքացիներին ցուցաբերած աջակցության համար։
Նա նաև շնորհավորել է իր գործընկերոջը 65-ամյակի կապակցությամբ՝ կարևորելով նրա անձնական նշանակալի ներդրումը երկու երկրների միջև հարաբերությունների ամրապնդման գործում:
Կողմերը գոհունակությամբ նշել են, որ ռուս-էմիրաթական բարեկամական հարաբերությունները դինամիկ զարգանում են բոլոր ոլորտներում։
Մարտի 11-ին Պուտինը Մերձավոր Արևելքում ստեղծված իրավիճակը նաև քննարկել էր Ադրբեջանի նախագահ Իլհամ Ալիևի հետ։