Սևան քաղաքում անցկացվել է ՀՀ վաստակավոր մարզիչ Վալերի Մնացականյանի հիշատակին նվիրված բռնցքամարտի առաջնություն
2 րոպեի ընթերցում
Գեղարքունիքի մարզի Սևան քաղաքում անցկացվել է բռնցքամարտի երիտասարդների և պատանիների առաջնություն, որը նվիրվել է ՀՀ վաստակավոր մարզիչ Վալերի Մնացականյանի հիշատակին:
«Արմենպրես»-ի թղթակցի հետ զրույցում մարզի բռնցքամարտի ֆեդերացիայի նախագահ Գևորգ Սարգսյանը տեղեկացրեց, որ հուշամրցաշարին մասնակցել է հանրապետության տարբեր համայնքներից ժամանած 190 բռնցքամարտիկ:
Առաջնությունն անցկացվել է նաև մարզում բռնցքամարտի մասսայականացման, ուժեղագույն պատանի բռնցքամարտիկներ ի հայտ բերելու և մարզի հավաքական թիմը համալրելու նպատակով:
«ՀՀ ֆիզկուլտուրայի և սպորտի վաստակավոր աշխատող, բռնցքամարտի բազմավաստակ մարզիչ, Սևան քաղաքում բռնցքամարտի զարգացման գործում լուրջ ավանդ ունեցած Վալերի Մնացականյանը երկար տարիներ մարզել է բազմաթիվ երիտասարդների, որոնք մեծ հաջողությունների են հասել և արժանացել աշխարհի, եվրոպայի, հանրապետական ու մարզային բարձր տիտղոսների: Նրա սաներն այսօր դարձել են արդեն մարզիչներ, սպորտի վարպետներ՝ շարունակելով Վալերի Մնացականյանի ոգով կրթել նոր բռնցքամարտիկների, որոնք դեռ նորանոր բարձունքների են հասնելու, նրանց շնորհիվ աշխարհի ու եվրոպական ռինգերում ծածանվելու է հայոց եռագույնը»,-նշեց Գևորգ Սարգսյանը:
Առաջնության հաղթողները պարգևատրվել են մեդալներով, պատվոգրերով, նվերներով և գավաթներով, իսկ մարզիչները՝ շնորհակալագրերով:
Մրցանակները հաղթողներին են հանձնել Վալերի Մնացականյանի որդին՝ Ալիկ Մնացականյանը, և թոռները։