Հնդկաստանի դեսպանը ՀՀ ՊԵԿ նախագահի տեղակալի հետ հանդիպմանն ընդգծել է երկկողմ համագործակցության զարգացման կարևորությունը
1 րոպեի ընթերցում
Հայաստանի Հանրապետության պետական եկամուտների կոմիտեի նախագահի տեղակալ Ռաֆայել Գևորգյանը հյուրընկալել է ՀՀ-ում Հնդկաստանի Հանրապետության արտակարգ և լիազոր դեսպան Նիլակշի Սահա Սինհային:
«Արմենպրես»-ի հաղորդմամբ՝ այս մասին հայտնում են ՀՀ պետական եկամուտների կոմիտեից՝ ներկայացնելով հանդիպման մանրամասները։
Նշվում է, որ հանդիպումը կազմակերպվել է ՊԵԿ աշխատակիցների մասնակցությամբ, ովքեր Հնդկաստանի տեխնիկական և տնտեսական համագործակցության (ITEC) ծրագրի շրջանակում կմասնակցեն «Ֆինանսական հանցագործությունների քննության և թվային հետախուզության առաջադեմ մեթոդներ» խորագրով դասընթացին։
«Քննարկման ընթացքում դեսպանը ներկայացրել է ծրագրի նպատակներն ու ակնկալիքները, անդրադարձ է կատարել դասընթացի բովանդակությանը և ընդգծել Հնդկաստանի և Հայաստանի միջև մասնագիտական համագործակցության զարգացման կարևորությունը»,-ասված է ՊԵԿ-ի տարածած հաղորդագրության մեջ։
Նշվում է, որ ՊԵԿ ներկայացուցիչները շնորհակալություն են հայտնել դեսպանին վերապատրաստման հնարավորության համար և ընդգծել, որ նման նախաձեռնությունները նպաստում են կարողությունների զարգացմանը և միջազգային լավագույն փորձի փոխանակմանը։