2 րոպեի ընթերցում
Հայաստանի կառավարությունն արտաքին քաղաքական հարցերում չի գործելու Ռուսաստանի Դաշնության դեմ։ «Արմենպրես»-ի փոխանցմամբ՝ այս մասին Հանրային հեռուստաընկերությանը տված հարցազրույցում հայտնեց Հայաստանի վարչապետ Նիկոլ Փաշինյանը։
«Մենք բոլոր տեղերում, մեր բոլոր գործընկերների հետ կիսում ենք հետևյալ միտքը, որ Ռուսաստանին, Ռուսաստանի շահերին վնասելը չի եղել, չկա և չի լինելու մեր օրակարգում։ Դա բացառված է, որևէ մեկը մեզ չի կարողանալու, եթե, նույնիսկ, փորձի… մինչև հիմա փորձեր չեն էլ եղել, որևէ մեկը մեզ չի կարողանալու ներքաշել Ռուսաստանի դեմ գործելու տրամաբանության մեջ»,- ասաց Փաշինյանը։
Հայաստանի վարչապետը նշեց՝ Ռուսաստանի գործընկերներին էլ հայտնում են, որ իրենք գործելու են հանուն Հայաստանի Հանրապետության շահի։
«Անձնական մակարդակը պակաս կարևոր չէ այս կոնտեքստում, ես շատ ուղիղ և ջերմ հարաբերություններ ունեմ ՌԴ նախագահ Վլադիմիր Պուտինի հետ, կառավարության նախագահ Միխայիլ Միշուստինի հետ։ Մենք հարց ենք տալիս ՌԴ գործընկերներին՝ քննադատություն ունե՞ք այս տրամաբանութանը։ Այստեղ մենք հասկանում ենք, որ կարող են որոշակի հատումներ լինել, բայց մենք չենք կարող ասել՝ մենք գործում ենք ի հեճուկս Հայաստանի շահերի և հանուն ոչ միայն Ռուսաստանի, այլև այլ երկրների շահերի»,- նշեց վարչապետը։
Նիկոլ Փաշինյանը հավելեց՝ ռուսական կողմը հատկապես մտահոգություններ ուներ օգոստոսի 8-ից հետո, երբ Վաշինգտոնում ստորագրվեց TRIPP նախագծի վերաբերյալ փաստաթուղթը։
«Մեկ փաստի վրա հրավիրեցի ՌԴ գործընկերների ուշադրությունը, որ մենք ստորագրել ենք այն բովանդակությունը, որը նախորդ 5 տարիների ընթացքում առաջարկել ենք Ռուսաստանի Դաշնությանը։ 5 բառ ենք ուզել՝ տարածքային ամբողջականություն, ինքնիշխանություն, իրավազորություն, փոխադարձություն, սահմանների անխախտելիություն, մենք ասել ենք՝ դրեք այս 5 բառը թղթի մեջ և ես ցանկացած պահի պատրաստ եմ այդ թուղթը ստորագրել»,- ասաց Նիկոլ Փաշինյանը։