2 րոպեի ընթերցում
Ախուրյան համայնքի Մարմաշեն վանական համալիրին նայող բարձունքի հարթավայրում հանդիսավորությամբ բացվել է Վահրամաբերդ-Մարմաշեն-Առափի «Արգիշտի I» արշավային արահետը։ Արահետի ստեղծման նախաձեռնությունը միտված է համայնքում զբոսաշրջության զարգացմանը, ինչպես նաև տարածաշրջանի մշակութային ժառանգությունը զբոսաշրջիկներին և տեղացիներին առավել մատչելի դարձնելուն։ Նախաձեռնությունն իրականացվել է «Յալկեզյան» և «Շեն» բարեգործական հիմնադրամների, «Բնատաճար» կազմակերպության և Ախուրյանի համայնքապետարանի համագործակցությամբ։
Ինչպես «Արմենպրես»-ին տեղեկացրին Ախուրյանի համայնքապետարանից, ընդհանուր առմամբ բարեկարգվել և կահավորվել է շուրջ 11 կմ երկարությամբ քայլարշավային արահետ, որն անցնում է մի շարք պատմական շերտերով՝ ներառյալ ուշ միջնադարյան գերեզմաններ, հուշարձանների ավերակներ և Արգիշտի Առաջինի սեպագիր արձանագրությունը (մ.թ.ա. VIII դար)։ Արահետի հարակից տարածքով հոսում է Ախուրյան գետը, իսկ երթուղու վերջնակետը Մարմաշեն վանական համալիրն է։
Ծրագրի շրջանակում մաքրվել է ամբողջ տարածքը, կառուցվել է չորս էկոլոգիապես անվտանգ փոքր կամուրջ, տեղադրվել են տեղեկատվական ցուցանակներ՝ շուրջ 15 կետում, որոնք ներկայացնում են պատմական և մշակութային նշանակության վայրեր։ Աշխատանքներն իրականացվել են այնպիսի ձևով, որ պահպանվի բնության բնական միջավայրը և էկոլոգիական հավասարակշռությունը։