2 րոպեի ընթերցում
Լիբանանի դատարանը որոշում է կայացրել ազատ արձակել Հաննիբալ Քադաֆիին՝ Լիբիայի նախկին առաջնորդ Մուամմար Քադաֆիի (1942-2011) որդուն՝ գրեթե տասը տարի նախնական կալանքից հետո։ «Արմենպրես»-ի փոխանցմամբ՝ այս մասին հայտնում է Al Arabia-ն։
Քադաֆիին հարցաքննելուց հետո դատավորը հրամայել է նրան ազատ արձակել «11 միլիոն դոլար գրավի դիմաց և արգելել ճանապարհորդել», - AFP գործակալությանն ասել է պաշտոնյան, որի անունը չի նշվում։
Հաննիբալ Քադաֆիի փաստաբան Լորան Բայոնը հաստատել է, որ հետաքննող դատավորը որոշումը կայացրել է հոկտեմբերի 17-ին Արդարադատության պալատում տեղի ունեցած հարցաքննությունից հետո։
Փաստաբանը նշել է, որ «գրավի դիմաց ազատ արձակումը բացարձակապես անընդունելի է կամայական կալանքի դեպքում», և որ իրենք կվիճարկեն գրավի որոշումը։
Նա նշել է, որ իր հաճախորդը «գտնվում է միջազգային պատժամիջոցների տակ» և չի կարող վճարել նման գումար։
Ամուսնացած լինելով լիբանանցի մոդելի հետ՝ Հաննիբալը փախել էր Սիրիա։ 2015 թվականի դեկտեմբերին նրան առևանգել են զինված անձինք, որոնք նրան տարել են Լիբանան, և որտեղ իշխանություններն, ի վերջո, ձերբակալել են նրան։
Քադաֆիին մեղադրել են լիբանանցի շիա հոգևորական Մուսա աս-Սադրի անհետացման մասին տեղեկատվությունը թաքցնելու համար գրեթե չորս տասնամյակ առաջ, երբ նա դեռ երեխա էր։
«Հեզբոլլահ» խմբավորման դաշնակից «Ամալ» շարժման հիմնադիր աս-Սադրն անհետ կորել է 1978 թվականին Լիբիա կատարած պաշտոնական այցի ժամանակ՝ իր օգնականի և լրագրողի հետ միասին։
Բեյրութը նրանց անհետացման համար մեղադրել է Մուամմար Քադաֆիին։