2 րոպեի ընթերցում
Շրջակա միջավայրի նախարարությունը սերտորեն աշխատում է Երևանի քաղաքապետարանի, Առողջապահության նախարարության և շահագրգիռ գերատեսչությունների հետ` գնահատելու Նուբարաշենի աղբավայրում տեղի ունեցած հրդեհի ազդեցությունը շրջակա միջավայրի և բնակչության առողջության վրա։
«Արմենպրես»-ի փոխանցմամբ՝ այս մասին տեղեկացրել է ՇՄ նախարար Համբարձում Մաթևոսյանը:
Ներկայում ՇՄՆ «Հայհիդրոմետ» ՊՈԱԿ-ը Երևանում իրականացնում է մթնոլորտային օդի որակի մշտադիտարկումներ։
Նմուշառումների լաբորատոր ուսումնասիրությունից հետո կտրվի մանրամասն տեղեկատվություն:
«Մինչև այդ խնդրում եմ հետևել Առողջապահության նախարարության հորդորներին և ցուցումներին»,-նշել է նախարարը:
Նուբարաշենի աղբավայրում հրդեհաշիջման աշխատանքները շարունակվում են: Երևանի քաղաքապետ Տիգրան Ավինյանը հայտարարել է, որ Նուբարաշենի աղբավայրում բռնկված հրդեհը ոչ թե պատահականություն է, այլ դիտավորություն, ինչի շուրջ ինքը զրուցել է ՀՀ ԱԱԾ տնօրենի և Ներքին գործերի նախարարի հետ։
Երևան քաղաքի շինհրապարակներում տեղադրված օդի որակի չափման սարքերից ստացված տվյալների համաձայն՝ Ժամը 17։00-ի դրությամբ օդի որակի ինդեքսի միջինացված ցուցանիշը մանրահատիկ փոշու համար կազմել է 56.6։ Օդի որակը գտնվում է չափավոր միջակայքում։