Հայաստանի տարածքից սիգի ձկնկիթի արտահանման ժամանակավոր արգելք է սահմանվել

Կառավարության որոշմամբ՝ 2027 թվականի հունվարի 2-ից 6 ամսով կարգելվի Հայաստանի Հանրապետության տարածքից սիգի ձկնկիթի արտահանումը։ Ինչպես «Արմենպրես»-ին տեղեկացրին Հայաստանի շրջակա միջավայրի նախարարությունից, որոշման նպատակն է նպաստել Սևանա լճի կենսառեսուրսների կայուն օգտագործմանը, սիգի պաշարների պահպանությանն ու բնական վերարտադրության ապահովմանը, նաև պաշտպանել երկրի պարենային անվտանգությունը։

Որոշման հիմնավորման համաձայն՝ Սևանա լճում սիգի արդյունագործական որսի կանոնակարգման արդյունքում վերջին տարիներին ձևավորվել է սիգի որոշակի կայուն կենսազանգված։ Մասնավորապես, 2025 թվականին սիգի կենսազանգվածը կազմել է 3591,8 տոննա՝ 2024 թվականի 1293 տոննայի դիմաց։ Միաժամանակ, արձանագրված դրական միտումները դեռևս բավարար չեն լճում սիգի բնականոն աճն ու օպտիմալ թվաքանակն ապահովելու համար։

Գիտական որոշ գնահատականների համաձայն՝ Սևանա լճում սիգի ընդհանուր պաշարը կարող է հասնել մինչև 10 000 տոննայի, իսկ արդյունագործական որսի հնարավոր ծավալը՝ շուրջ 2000 տոննայի։ Հաշվի առնելով սիգի ձկնկիթի բարձր պահանջարկն ու միջազգային շուկայում դրա արժեքը՝ արտահանման սահմանափակումը միտված է կանխելու կենսառեսուրսների նկատմամբ սպառողական վերաբերմունքի և մարդածին ազդեցության հնարավոր բացասական հետևանքները։