Ֆրանսիան կաջակցի Հայաստանին Ֆրանկոֆոնիայի 2027թ․ խաղերը բարձր մակարդակով անցկացնելու գործում
2 րոպեի ընթերցում
Հայաստանի Հանրապետության վարչապետի աշխատակազմի ղեկավար Արայիկ Հարությունյանը Փարիզում հանդիպել է Ֆրանսիայի տարբեր գերատեսչությունների ներկայացուցիչներից բաղկացած աշխատանքային խմբի անդամներին՝ Օլիմպիական և Պարալիմպիկ խաղերի միջգերատեսչական պատվիրակ Պիեր-Անտուան Մոլինայի գլխավորությամբ։ «Արմենպրես»-ի փոխանցմամբ՝ այս մասին հայտնում է վարչապետի աշխատակազմի Տեղեկատվության և հասարակայնության հետ կապերի վարչությունը։
Հանդիպմամբ տրվել է Ֆրանսիա-Հայաստան փոխանակումների մեկնարկը՝ Փարիզ 2024-ի Խաղերի և Միջազգային մեծ սպորտային միջոցառումների (GESI) փորձը ներկայացնելու ուղղությամբ: Ֆրանսիական կողմի փորձը հաշվի է առնվելու Հայաստանում 2027 թվականին կայանալիք Ֆրանկոֆոնիայի խաղերի կազմակերպման և անցկացման գործընթացում:
Վարչապետի աշխատակազմի ղեկավար Արայիկ Հարությունյանը նշել է, որ այդ փորձը մեծ նշանակություն կունենա հայկական կողմի համար՝ հետագա աշխատանքները բարձր մակարդակով իրականացնելու գործում:
Պիեր-Անտուան Մոլինան ընդգծել է, որ իրենք պատրաստ են կիսվել տեխնիկական և գործնական կարողություններով՝ ցուցաբերելով անհրաժեշտ օժանդակություն հայ գործընկերներին:
Հանդիպմանն անդրադարձ է կատարվել Հայաստանում խաղերի կազմակերպման նպատակով մինչ այժմ իրականացված աշխատանքներին և հետագա քայլերին: