Կառավարությունն առաջարկում է վերանվանել Պետական գույքի կառավարման և Ջրային կոմիտեներն ու դրանք փոխանցել գործադիրի ենթակայությանը

Հայաստանի կառավարությունն առաջարկում է Պետական գույքի կառավարման կոմիտեն վերանվանել Պետական ակտիվների կառավարման կոմիտե, իսկ Ջրային կոմիտեն՝ Հողի և ջրի կոմիտե։ Երկու կառույցներն էլ Տարածքային կառավարման և ենթակառուցվածքների նախարարության ենթակայությունից նախատեսվում է փոխանցել կառավարության ենթակայությանը։

«Արմենպրես»-ի հաղորդմամբ՝ Ազգային ժողովում «Կառավարության կառուցվածքի և գործունեության մասին» օրենքում և հարակից օրենքներում փոփոխությունների նախագծերը ներկայացրեց ՀՀ տարածքային կառավարման և ենթակառուցվածքների նախարարի տեղակալ Առնակ Ավետիսյանը։

Նրա խոսքով՝ փոփոխությունների նպատակն է կառավարման կառուցվածքը համապատասխանեցնել Կառավարության ծրագրով սահմանված առաջնահերթություններին՝ համախմբելով փոխկապակցված գործառույթները, կենտրոնացնելով մասնագիտական կարողությունները և բարձրացնելով հաշվետվողականության մակարդակը։

Պետական ակտիվների կառավարման ոլորտում նախատեսվում է միասնական քաղաքականություն իրականացնել պետական անշարժ ու շարժական գույքի, ընկերություններում պետական բաժնեմասերի և այլ ակտիվների կառավարման համար։

Ավետիսյանը նշեց, որ բարեփոխումների նպատակներից են ակտիվների կառավարման արդյունավետության ու եկամտաբերության բարձրացումը, չօգտագործվող գույքը տնտեսական շրջանառության մեջ ներգրավելը և նոր ներդրումներ ապահովելը։

«Կարևորություն ունի այս ոլորտում ապօրինի գույքի վերադարձման իրավական գործընթացների արդյունքում պետությանը վերադարձված ակտիվների արդյունավետ և միասնական կառավարման համակարգի ձևավորումը՝ հանրային շահի հաշվառմամբ»,- ասաց փոխնախարարը։

Նա անդրադարձավ նաև պետական մասնակցությամբ բաժնետիրական ընկերությունների գործունեության արդյունավետության բարձրացմանն ու կորպորատիվ կառավարման համակարգի զարգացմանը։

Ջրային ոլորտում փոփոխությունների անհրաժեշտությունը փոխնախարարը կապեց առաջիկա տարիներին նախատեսվող մեծածավալ հանրային ներդրումների և դրանց պլանավորման ու կառավարման համար համապատասխան կարողություններ ունեցող կառույցի անհրաժեշտության հետ։

«Միաժամանակ հողի և ջրի կառավարման փոխկապակցված գործառույթների բաշխվածությունը տարբեր մարմինների միջև սահմանափակում է միասնական պլանավորման հնարավորությունը և հանգեցնում հատվածային մոտեցումների»,- ընդգծեց Ավետիսյանը։

Նախագծով առաջարկվում է Էկոնոմիկայի նախարարությունից Հողի և ջրի կոմիտեին փոխանցել գյուղատնտեսական հողերի մշտադիտարկման, արդյունավետ օգտագործման, մելիորատիվ վիճակի բարելավման և պահպանման գործառույթները։

Ըստ փոխնախարարի՝ այդ գործառույթների համախմբումը հնարավորություն կտա հողերի վիճակի գնահատումը, օգտագործման ներուժը և ոռոգման ապահովումը ներառել կառավարման միասնական շրջանակում։ Մասնավորապես՝ ոռոգման համակարգերում ներդրումների առաջնահերթությունները որոշելիս հնարավոր կլինի հաշվի առնել հողերի օգտագործման իրական կարիքներն ու հնարավորությունները։