Մակրոնը հայտնել է, թե որ դեպքում Ֆրանսիան կարող է դեսպանատուն բացել Պաղեստինի Պետությունում
1 րոպեի ընթերցում
Ֆրանսիայի նախագահ Էմանուել Մակրոնը հայտարարել է, որ Ֆրանսիան Պաղեստինի Պետությունում դեսպանատուն կարող է բացել միայն այն բանից հետո, երբ ազատ կարձակվեն Գազայի հատվածում պահվող բոլոր իսրայելցի պատանդները։
«Արմենպրես»-ի փոխանցմամբ՝ ինչպես հայտնում է Le Monde-ն, Մակրոնն այս մասին ասել է ՄԱԿ-ի կենտրոնակայանում ունեցած ելույթի ժամանակ։
«Ես կկարողանամ դեսպանատուն բացել Պաղեստինում, հենց որ 48 պատանդները վերադարձվեն», - ասել է Ֆրանսիայի նախագահը։
Նրա կարծիքով՝ հենց այդ ուղին թույլ կտա հասնել ինքնիշխան և ապառազմականացված Պաղեստինի պետության կառուցմանը։
«Ֆրանսիայի և նրա եվրոպացի գործընկերների պահանջներն Իսրայելին պակաս լուրջ չեն լինի։ Նրանք են որոշելու Իսրայելի հետ համագործակցության մակարդակն այն միջոցառումների հիման վրա, որոնք նա կձեռնարկի պատերազմի դադարեցման և խաղաղության շուրջ բանակցությունների համար», - խոստացել է Մակրոնը։
Մակրոնը նաև հայտարարել է՝ ակնկալում է, որ արաբական երկրներն էլ կկատարեն իրենց պարտավորությունները, կճանաչեն Իսրայել պետությունը և նրա հետ նորմալ հարաբերություններ կհաստատեն։