ԱՄՆ ղեկավարությունն արձագանքել է Բոլսոնարուի ազատազրկման վճռին

ԱՄՆ նախագահ Դոնալդ Թրամփը Բրազիլի  նախկին նախագահ Ժաիր Բոլսոնարուի նկատմամբ 27 տարվա ազատազրկման դատավճիռն անվանել է «անակնկալ»։ «Արմենպրես»-ի փոխանցմամբ՝ այս մասին հաղորդում է BBC-ն։

Թրամփը, որը նախկինում աջակցություն էր հայտնել Բոլսոնարուին և 50% մաքսատուրքեր սահմանել Բրազիլի նկատմամբ, տեղի ունեցածը համեմատել է սեփական փորձի հետ։

«Սա շատ նման է այն բանին, ինչ նրանք փորձում էին անել ինձ հետ։ Բայց նրանց դա բոլորովին չհաջողվեց», - նշել է ԱՄՆ նախագահը՝ հավանաբար, նկատի ունենալով իր դեմ հարուցված քրեական գործերը։

«Կարծում եմ՝ սա շատ վատ է Բրազիլի համար», - հավելել է նա։

Ժաիր Բոլսոնարուի դատավճռին արձագանքել է նաև ԱՄՆ պետքարտուղար Մարկո Ռուբիոն՝ նշելով, որ Գերագույն դատարանը «անարդարացիորեն է որոշել բանտարկել» նախկին նախագահին։ 

«Միացյալ Նահանգները համապատասխան ձևով կարձագանքի այս վհուկների որսին», - գրել է Ռուբիոն X սոցիալական հարթակում։ 

Բրազիլի արտգործնախարարությունն արագ արձագանքել է Ռուբիոյի գրառմանը։

«ԱՄՆ պետքարտուղար Մարկո Ռուբիոյի՝ այսօր հնչեցրած սպառնալիքները, նրա հայտարարությունը, որն ուղղված է բրազիլական իշխանությունների դեմ և անտեսում է փաստերն ու համոզիչ ապացույցները, չեն վախեցնի մեր ժողովրդավարությանը», - X-ում գրել է գերատեսչությունը։

Բրազիլի նախկին նախագահը մեղավոր է ճանաչվել ռազմական հեղաշրջման փորձ կազմակերպելու համար։ 2023 թ. հունվարի 8-ին Բոլսոնարուի աջակիցները գրոհել էին կառավարական շենքերի վրա, սակայն զինվորականներից բավարար չափով աջակցություն չէր եղել հեղաշրջում իրականացնելու համար։ Հասարակական կարգը վերականգնվել էր, ավելի քան 1500 մարդ՝ ձերբակալվել։