2 րոպեի ընթերցում
Իրանի արտաքին գործերի նախարար Աբբաս Արաղչին հայտարարել է, որ իր երկիրը չի ցանկանում, որպեսզի պատերազմը տարածվի, եթե այն իրենց չպարտադրվի։
«Արմենպրես»-ի հաղորդմամբ՝ ինչպես փոխանցում է Mehr-ը, այս մասին Աբբաս Արաղչին հայտարարել է Թեհրանում հավատարմագրված դեսպանների հետ հանդիպմանը:
«Մենք սկզբունքորեն չէինք ուզում այս պատերազմը: Մենք դիվանագիտությամբ էինք զբաղվում մեր միջուկային ծրագրի վերաբերյալ, բայց մեզ պարտադրեցին այս ագրեսիան: Մենք պաշտպանում ենք ինքներս մեզ, ինչը լիովին օրինական է»,- ասել է Արաղչին՝ հավելելով, որ եթե Իսրայելը դադարեցնի ագրեսիան, ապա Իրանը նույնպես կդադարեցնի համապատասխան արձագանքները:
Արտգործնախարարի խոսքով՝ Իրանը պատրաստ է ցանկացած համաձայնության, որն ուղղված է Իրանի կողմից միջուկային զենքի ձեռքբերումը կանխելուն:
«Իհարկե, եթե համաձայնագրի նպատակն Իրանին միջուկային իրավունքներից զրկելն է, ապա բնական է, որ մենք պատրաստ չենք նման համաձայնագրի, և այդ տրամաբանությամբ մենք բանակցությունների մեջ մտանք Միացյալ Նահանգների հետ ու անցկացրեցինք բանակցությունների հինգ փուլ, իսկ վեցերորդ փուլում մենք պետք է ամերիկյան կողմին ներկայացնեինք հնարավոր համաձայնագրի մեր ծրագիրը»,- նշել է Արաղչին՝ համոզմունք հայտնելով, որ իրանական կողմից առաջարկը կարող է ճանապարհ բացել համաձայնագրի համար:
Այդուհանդերձ, ըստ Իրանի արտգործնախարարի, միանգամայն ակնհայտ է, որ Իսրայելը միջուկային խնդրի վերաբերյալ չի ցանկանում որևէ համաձայնագիր, իսկ ընթացիկ բանակցությունների կեսին նրա հարձակումը ցույց է տալիս նրա հակազդեցությունը դրանց:
Արաղչին հույս է հայտնել, որ միջազգային հանրությունը բավարար ուշադրություն կդարձնի այս հարցին և կդատապարտի Իսրայելի գործողությունները, ինչը, նրա խոսքով, տարածաշրջանում և ամբողջ աշխարհում խաղաղություն հաստատելու լավագույն միջոցն է: