2 րոպեի ընթերցում
Իրանը կարող է վերանայել Ատոմային էներգիայի միջազգային գործակալության (ԱԷՄԳ) հետ հարաբերությունները, եթե կազմակերպության Կառավարիչների խորհուրդը բացասական բանաձև ընդունի իրանական միջուկային ծրագրի վերաբերյալ: «Արմենպրես»-ի փոխանցմամբ՝ այս մասին հաղորդում է Tasnim գործակալությունը՝ վկայակոչելով Իրանի Ատոմային էներգիայի կազմակերպության ներկայացուցիչ Բեհրուզ Քամալվանդիին։
«Անցյալ անգամ մենք զգուշացրեցինք, բայց մեզ չլսեցին և մենք յոթ անգամ ավելացրեցինք մինչև 60% հարստացված ուրանի արտադրության ծավալները: Այժմ մենք նաև ունենք պատասխան քայլերի ցանկ, և մենք արդեն տեղեկացրել ենք նրանց այդ մասին: Ակնհայտ է, որ գործակալությունը չպետք է ակնկալի, որ Իրանը կշարունակի կառուցողական համագործակցությունն, ինչպես նախկինում», - ասել է նա՝ մեկնաբանելով հակաիրանական բանաձևի հնարավոր ընդունումն ԱԷՄԳ-ի Կառավարիչների խորհրդի առաջիկա նիստում:
Մայիսի 31-ին AFP-ն տվյալներ էր ներկայացրել ԱԷՄԳ-ի գաղտնի զեկույցից, որոնցից հետևում էր, որ վերջին ամիսներին Իրանն զգալիորեն արագացրել է բարձր հարստացված ուրանի արտադրությունը: Դրան ի պատասխան՝ Իրանի արտաքին գործերի նախարարությունը հայտարարել է, որ զանգվածային լրատվամիջոցներում հրապարակված փաստաթուղթը «չի արտացոլում գործակալության և Իսլամական Հանրապետության միջև համագործակցության իրական մակարդակը», և ԱԷՄԳ-ին մեղադրել է, որ այն, իբր, հենվում է «կեղծ փաստաթղթերի վրա, որոնք նրան են տրամադրվել Իսրայելի կողմից»։
ԱԷՄԳ-ի գլխավոր տնօրեն Ռաֆայել Գրոսին հայտարարել է, որ Իրանի միջուկային ծրագրի վերաբերյալ զեկույցն անաչառ է և հիմնվում է տեղում աշխատող տեսուչների տեղեկատվության վրա: