Իսրայելը թույլատրել է մարդասիրական օգնությամբ բեռնված շուրջ 100 մեծ բեռնատարի մուտքը Գազա
2 րոպեի ընթերցում
Իսրայելի իշխանությունները թույլատրել են մարդասիրական օգնությամբ բեռնված շուրջ հարյուր մեծ բեռնատարի մուտքը Գազայի հատված: «Արմենպրես»-ի փոխանցմամբ՝ այս մասին հաղորդում է The Jerusalem Post-ը։
«Մենք թույլտվություն ենք խնդրել և հավանություն ստացել օրվա ընթացքում Գազայի հատված ավելի մեծ քանակությամբ բեռնատարների մուտք գործելու համար, դրանք շատ ավելի են, քան մենք խնդրել էինք նախորդ օրը», - Ժնևում կայացած ճեպազրույցի ժամանակ հայտարարել է ՄԱԿ-ի հումանիտար հարցերի համակարգման վարչության ներկայացուցիչ Յենս Լերկեն։
Նա հավելել է, որ խոսքը գնում է շուրջ 100 բեռնատարի մասին։
Լերկեի խոսքով՝ այժմ բեռը պետք է պահեստավորվի, ինչից հետո այն կարիքավորներին բաշխվի Գազայի հատվածում գոյություն ունեցող համակարգի միջոցով։
BBC-ն նշում է, որ ՄԱԿ-ի գլխավոր քարտուղարի հումանիտար հարցերով տեղակալ և արտակարգ օգնության համակարգող Թոմ Ֆլետչերն իր հերթին հայտնել է, որ առաջիկա 48 ժամում 14 000 փոքրիկ կարող է մահանալ, եթե մանկական կերով բեռնված բեռնատարները ժամանակին չհասնեն Գազա։
Մայիսի 19-ին Իսրայելը թույլատրել է հումանիտար օգնությամբ բեռնված ինը բեռնատարի մուտք Գազայի հատված Քերեմ Շալոմ անցակետով։ Ինչպես Լերկեն, այնպես էլ Ֆլետչերը հայտնել են, որ բեռնատարներից միայն հինգն են անցել պաղեստինյան անկլավի տարածք՝ 11-շաբաթյա շրջափակումից հետո։