ԱԶԲ ներկայացուցիչները վերահաստատել են իրենց աջակցությունը Հայաստանում սնանկության ոլորտի բարեփոխման գործընթացին
2 րոպեի ընթերցում
Հայաստանի արդարադատության նախարարի տեղակալ Տիգրան Դադունցն ընդունել է Ասիական զարգացման բանկի և Զարգացման ֆրանսիական գործակալության համատեղ առաքելության ներկայացուցիչներին:
Ինչպես «Արմենպրես»-ը տեղեկանում է Արդարադատության նախարարության տարածած հաղորդագրությունից, հանդիպման ընթացքում քննարկվել է ԱԶԲ-ի և ԶՖԳ- հետ համատեղ իրականացվող բյուջետային աջակցության վարկային ծրագրի Ենթածրագիր 3-ի վարկային միջոցների ներգրավման նպատակով կազմված քաղաքականության աղյուսակով նախատեսված միջոցառումների ընթացքը:
Տիգրան Դադունցը ներկայացրել է սնանկության ոլորտում իրականացվող բարեփոխումների ընթացքը, մասնավորապես՝ Սնանկության նոր օրենսգրքի նախագծի մշակման գործընթացը: Ընդգծվել է, որ Ասիական զարգացման բանկի ազգային և միջազգային փորձագետների ներգրավմամբ մշակվել է Սնանկության օրենսգրքի նախագիծը, որը արդեն իսկ շրջանառվել է շահագրգիռ մարմինների շրջանակում և տեղադրվել է իրավական ակտերի նախագծերի հրապարակման միասնական կայքում (e-draft.am)՝ հետևյալ հղումով:
Երկու կողմերն ընդգծել են սնանկության ոլորտի բարեփոխման և նոր օրենսգրքի ընդունման կարևորությունը, ինչը հնարավորություն կտա բարելավել և զարգացնել ոլորտը, սնանկության վարույթին առնչվող բոլոր հարցերը կարգավորել միատեսակ չափանիշներով և սկզբունքներով: Առաքելության ներկայացուցիչներին ներկայացվել են նաև սնանկության էլեկտրոնային համակարգի (e-bankruptcy) ներդրման և գործարկման ուղղությամբ իրականացվող աշխատանքները, հնարավորությունները և կատարման ժամկետները: Ասիական զարգացման բանկի ներկայացուցիչները վերահաստատել են իրենց աջակցությունը Հայաստանում սնանկության ոլորտի բարեփոխման գործընթացին: