Գյումրիի արտահերթ ընտրությունների քարոզարշավի մեկնարկին քաղաքական ուժերը հանդիպումներ են ունեցել ընտրողների հետ

Գյումրիի ավագանու արտահերթ ընտրությունների քարոզարշավի մեկնարկին քաղաքական ուժերը քաղաքի տարբեր թաղամասերում հանդիպումներ են ունեցել ընտրողների հետ՝ ներկայացնելով իրենց ծրագրերը:

Ինչպես տեղեկացնում է «Արմենպրես»-ի թղթակիցը, Գյումրիի տեխնոպարկի մեծ սրահում Եվրադաշինքի և Եվրաքվեի աջակիցներին նախընտրական ծրագիրը ներկայացրեց Լևոն Բարսեղյանը. կանաչապատում, ոռոգման համակարգի կառուցում, «Կումայրի» արգելոցի շինարարական թույլտվությունների մեխանիզմի ստեղծում, համայնքապատկան ՀՈԱԿ-ների աշխատակիցների աշխատավարձի բարձրացում, պետական իշխանությունների հետ համագործակցությամբ ՌԴ 102-րդ ռազմաբազայից եկող ռիսկերի չեզոքացում, փողոցների նորոգում և այլն՝ սրանք այն գործողություններն են, որոնք ներկայացված են Եվրադաշինքի ծրագրում: Ի դեպ, նրանք ընտրական քվեաթերթիկում 6-րդ համարն են:

«Մայր Հայաստան» դաշինքը Գյումրու ավագանու ընտրությունների պաշտոնական քարոզարշավի մեկնարկը տվեց Գյումրիում ապաստան գտած արցախցիների հետ հանդիպումով: Դաշինքը գլխավորող Կարեն Սիմոնյանը շեշտեց, որ արցախցիների առաջ ծառացած բազմաթիվ հարցեր՝ սոցիալական, աշխատանքային, «Մայր Հայաստան» դաշինքի թիմի ուշադրության կենտրոնում են: Հանդիպմանը ներկա են եղել նաև Ստեփանակերտի նախկին քաղաքապետ Դավիթ Սարգսյանը և Արցախի հերոս Կարեն Ջալավյանը:

«Քաղաքացիական պայմանագիր» կուսակցությունը պաշտոնական քարոզարշավը սկսեց բակային հանդիպումներով՝ քվեաթերթիկում թիվ 1 համարը ներկայացնող իշխող քաղաքական ուժը՝ Գյումրի համայնքի ղեկավարի ժամանակավոր պաշտոնակատար Սարիկ Մինասյանի գլխավորությամբ, ծրագիրը ներկայացրեց Երկաթգիծ, Նորավան և Ստոյմաշ թաղամասերում:

«Մեր քաղաքը» դաշինքը քարոզարշավի մեկնարկից առաջ այցելեց  Շիրակ պանթեոն՝ հարգանքի տուրքը մատուցելու Արցախյան պատերազմի հերոսների հիշատակին: