Շուրջ 300 հազար դպրոցականներ բաժանորդային ծրագրով այցելել են թանգարաններ ու թատրոններ
1 րոպեի ընթերցում
ԵՐԵՎԱՆ, 8 ՀՈՒՆՎԱՐԻ, ԱՐՄԵՆՊՐԵՍ։ Հայտարարված մշակութային և կրթության տարվա շրջանակներում շուրջ 300 հազար դպրոցականների համար ապահովվել է բաժանորդային ծրագրով այցելություն թանգարաններ և թատրոններ, որը նախորդ տարվա ցուցանիշը գերազանցում է 46 տոկոսով։
«Արմենպրես»-ի հաղորդմամբ՝այս մասին հայտնեց Հայաստանի Հանրապետության կրթության, գիտության, մշակույթի և սպորտի նախարար Ժաննա Անդրեասյանը հունվարի 8-ի ասուլիսին՝ հավելելով, որ այդ ցուցանիշն ընդգրկում է դպրոցականների 70 տոկոսին։
«Ուսումնական տարին բոլոր մարզերում մեկնարկեցինք մշակութային էքսպոներով: Բավականին ակտիվ աշխատանք է տարվել, որպեսզի դպրոցականներն ավելի հաճախ այցելեն թանգարաններ, համերգասրահներ ու թատրոններ։ Ընդ որում, ոչ միայն որպես ժամանց, այլ նաև՝ կրթական ծրագրի մաս»,-նշեց Անդրեասյանը։
Նրա խոսքով՝ անցած տարվա ընթացքում 21 մանկապատանեկան մշակութային, կրթամշակութային ծրագիր է իրականացվել՝ նախորդ 18-ի փոխարեն։ Դրանց մասնակցել է ավելի քան 31 հազար երեխա։
Հատուկ ուշադրություն է դարձվել նաև ներառականության ապահովմանն ուղղված միջոցառումներին՝ 7 թիրախային ծրագրերի իրականացման միջոցով, որոնց մասնակցությունը ավելի քան 30 տոկոսով գերազանցել է նախորդ ցուցանիշը։