1 րոպեի ընթերցում
ԵՐԵՎԱՆ, 14 ԴԵԿՏԵՄԲԵՐԻ, ԱՐՄԵՆՊՐԵՍ: Վրաստանի վարչապետ Իրակլի Կոբախիձեն երկրի նախագահի պաշտոնում իշխող «Վրացական երազանք» կուսակցության թեկնածու Միխայիլ Կավելաշվիլիի ընտրվելուց հետո հայտարարել է, որ Վրաստանը հավատարիմ է մնում եվրաինտեգրման ուղենիշին և հնարավոր ամեն ինչ կանի Եվրամիությանն անդամակցելու համար։ «Արմենպրես»-ի հաղորդմամբ՝ այս մասին Իրակլի Կոբախիձեն հայտարարել է Վրաստանում լրագրողների հետ ճեպազրույցի ընթացքում։
Քաղաքականություն
Վրաստանի նախագահ է ընտրվել ազգային հավաքականի նախկին ֆուտբոլիստ Միխայիլ Կավելաշվիլին
«Մեր նպատակը եվրաինտեգրումն է, դրա համար արվելու է ամեն ինչ: Միակ բանը, որը չի կարող լինել փոխզիջման առարկա, դա մեր ինքնիշխանությունն է, անկախությունը, մեր տարածքային ամբողջականությունը: Մնացած ամեն ինչ քննարկման թեմա է: Մենք ունենք կարմիր գծեր, բայց միևնույն ժամանակ պատրաստ ենք անել ամեն ինչ, որպեսզի Վրաստանն ի վերջո դառնա Եվրամիության անդամ։ Սա նաև նորընտիր նախագահ Կավելաշվիլիի դիրքորոշումն է: Գտնում եմ, որ մինչև 2030 թվականը բացարձակապես իրական է Եվրամիության անդամ դառնալը»,- նշել է Կոբախիձեն։