Բարելավվում է Երանոս գյուղի խմելու ջրի մատակարարումը

ԳԱՎԱՌ, 21 ՆՈՅԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի Մարտունի համայնքի Երանոս գյուղում ՀՀ կառավարության կողմից 2024 թվականին իրականացվող սուբվենցիոն ծրագրի շրջանակներում արդեն ավարտական փուլում են գտնվում խմելու ջրատարի արտաքին ցանցի և ջրահավաք 1 ավազանի կառուցման աշխատանքները։

Ինչպես «Արմենպրես»-ին տեղեկացրին Մարտունու համայնքապետարանի աշխատակազմից, Երանոսի խմելու ջրատարի արտաքին ցանցի և ջրահավաք ավազանի կառուցման ծրագրի պայմանագրային արժեքը կազմում է 22 միլիոն 407 հազար դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Մարտունու համայնքապետարանը։

Ծրագրով նախատեսված է Երանոսի «Շողան աղբյուր» տարածքում ջրահավաք ավազանի և նրանից սնվող 1900 մետր երկարության ջրատարի կառուցում ու միացում գյուղը սնուցող ներքին ցանցին։

Շինարարական աշխատանքները մեկնարկել են 2024 թվականի սեպտեմբերի կեսերից և նոյեմբերի 20-ի դրությամբ արդեն գտնվում են ավարտական փուլում։ 

Ծրագրի իրականացման արդյունքում Երանոս գյուղին մատակարարվող խմելու ջրի հզորությունն ավելանալու է շուրջ 7 լիտր վայրկյանով։ Ծրագրի շահառու են հանդիսանում Երանոս գյուղի բոլոր տնտեսությունները։ 

Շինարարական աշխատանքներն իրականացրել է   «Հայկ և Նորիկ» ՍՊԸ-ն։