2 րոպեի ընթերցում
ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ: Իրանի նախագահ Մասուդ Փեզեշքիանը և նրա ֆրանսիացի գործընկեր Էմանուել Մակրոնը քննարկել են Իսրայելի ու լիբանանյան «Հեզբոլլահ» շարժման միջև ռազմական գործողությունները դադարեցնելու և հրադադար հաստատելու ուղիները: Այդ մասին «Արմենպրես»-ը տեղեկանում է իրանական IRNA գործակալությունից:
Հոկտեմբերի 13-ի երեկոյան կայացած հեռախոսազրույցում Փեզեշքիանը և Մակրոնը կարծիքներ են փոխանակել Մերձավոր Արևելքի իրադարձությունների, այդ թվում՝ Լիբանանի հարավում ստեղծված իրադրության շուրջ, որտեղ իսրայելական ուժերը ցամաքային գործողություն են սկսել և շարունակում են ինտենսիվ ավիահարվածները։
Իրանի նախագահը հայտարարել է, որ իր երկիրը միշտ ցանկացել է, որ տարածաշրջանում պահպանվի անվտանգությունը, և ողջունում է հրադադարը, որպեսզի վերջ դրվի շարունակվող մարտական գործողություններին:
Նա ասել է, որ Իրանը նույնիսկ զսպվածություն է դրսևորել այն բանից հետո, երբ Իսրայելը հուլիսին Թեհրանում սպանեց ՀԱՄԱՍ-ի քաղաքական առաջնորդ Իսմայիլ Հանիեին:
Փեզեշքիանն ասել է, որ Իրանի Իսլամական Հանրապետությունը ողջունում և աջակցում է ցանկացած առաջարկություն, որը կվերականգնի խաղաղությունն ու կայունությունը տարածաշրջանում, և իր ֆրանսիացի գործընկերոջը կոչ է արել շարունակել ջանքերը եվրոպական այլ երկրների հետ միասին՝ ստիպելու Իսրայելին դադարեցնել պատերազմը Գազայի հատվածում և Լիբանանում: