2 րոպեի ընթերցում
ԳՅՈՒՄՐԻ, 20 ՀՈՒԼԻՍ, ԱՐՄԵՆՊՐԵՍ: Գյումրիում համայնքապետարանի նախաձեռնությամբ մեկնարկեց պանրխաշի փառատոնը: Փառատոնը տեղի է ունենում «Աբովյան» ճեմափողոցում։ Ինչպես տեղեկացնում է «Արմենպրես»-ը, փառատոնին մասնակցում են Գյումրիում սննդի ծառայություն մատուցող մոտ 20 կազմակերպություն։
Պանրախաշը առավել բնորոշ է Շիրակի մարզի բնակչությանը։ Գյումրիում ոչ միայն ընտանիքներում, այլ նաև շատ ռեստորաններ իրենց ճաշացանկերում ներառում են այս կերակրատեսակը: Պանրխաշը բաղկացած է լավաշից ու չեչիլ պանրից, իսկ չեչիլ պանիրը ավելի տարածված է Շիրակում։
«Մշտապես ասել ենք, որ Գյումրիի զարգացումը տեսնում ենք նաև փառատոնային կյանքի զարգացմամբ և շատ կարևոր է, որ օրացուցային հստակ փառատոնային ծրագիր ունենա Գյումրին, և մարդիկ իրենց զբոսաշրջային ակտիվությունը ծրագրելիս նկատի առնեն, թե տարվա որ ժամանակահատվածում և տարվա որ եղանակին կարող են լինել Գյումրիում։ Եթե ուզում ենք ունենալ կայուն զբոսաշրջային հոսքեր, պետք է առաջարկենք պրոդուկտներ՝ այս իմաստով փառատոնային կյանքի զարգացումը դրա կարևոր ցուցիչներից է»,-«Արմենպրես»-ին տեղեկացրեց Գյումրիի քաղաքապետարանի մշակույթի և երիտասարդության հարցերի բաժնի ղեկավար Լիլիթ Թովմասյանը՝ հավելելով, որ գաղափարը ծնվել է քննարկումների արդյունքում, այն առաջարկել է «Մարիամ և Երանուհի Ասլամազյան քույրերի պատկերասրահի» աշխատակցուհի Անի Հակոբյանը։
Փառատոնի շրջանակներում սննդի օբյեկտները պանրխաշ կպատրաստեն, տեղի կունենա համտես, որից հետո քվեարկություն ու «Գրան Պրի» կշնորհվի հաղթողին։
Արմենուհի Մխոյան