Ռուսաստանցիները Բելառուսի նախագահ Ալեքսանդր Լուկաշենկոյին համարում են ամենից ավելի մեծ ժողովրդականություն վայելող քաղաքական գործիչը ԱՊՀ-ի երկրների ղեկավարների շ

ՄՈՍԿՎԱ, 11 ՆՈՅԵՄԲԵՐԻ, ԱՐՄԵՆՊՐԵՍ: Ռուսաստանցիները Բելառուսի նախագահ Ալեքսանդր Լուկաշենկոյին համարում են ամենից ավելի մեծ ժողովրդականություն վայելող քաղաքական գործիչը ԱՊՀ-ի երկրների ղեկավարների շրջանում: Այդ մասին ասված է տարածաշրջանային հետազոտությունների ու քաղաքական տեխնոլոգիաների «Փորձագետների հանրակցությունե ազգային ինստիտուտի հաշվետվության մեջ, որը նոյեմբերի 10-ին լրագրողներին է ներկայացվել Մոսկվայում: Հետազոտության համաձայն, Ալեքսանդր Լուկաշենկոն վայելում է հարցված ռուսաստանցիների 52 տոկոսի համակրանքը: Նրան հաջորդում է Ղազախստանի նախագահ Նուրսուլթան Նազարբաեւը, որին նշել են ռուսաստանցիների 47 տոկոսը: Մեծ տարբերությամբ /23 տոկոս/ երրորդ տեղում է Ուկրաինայի նախագահ Վիկտոր Յուշչենկոն, իսկ 14 տոկոսով չորրորդ տեղում՝ Ադրբեջանի նախագահ Իլհամ Ալիեւը: ԱՊՀ-ի երկրների մնացած ղեկավարները հավաքել են հարցման մասնակիցների ձայների 10 տոկոսից պակաս մասը: Հետազոտությունը, որի նպատակն էր Համագործակցության երկրների նկատմամբ Ռուսաստանի քաղաքացիների վերաբերմունքի բացահայտումը, անցկացվել է հոկտեմբեր ամսին: Հարցախույզի մասնակիցները գնահատել են ԱՊՀ-ի երկրների սոցիալ-տնտեսական դրությունը, ներքաղաքական իրավիճակը, Համագործակցության երկրների կողմից Ռուսաստանի նկատմամբ վարվող քաղաքականությունը եւ ԱՊՀ-ի պետությունների ղեկավարների ազդեցիկությունը: Հարցումների ընթացքում նաեւ պարզվել է, որ ռուսաստանցիների մեծամասնությունը առավել բարենպաստ են համարում իրենց հայրենակիցների ապրելը Բելառուսում, երկրորդ տեղում Ղազախստանն է, երրորդում՝ Ուկրաինան: Ըստ հաշվետվության հեղինակների, իրենց հետազոտությունը հաստատել է, որ ԽՍՀՄ-ի փլուզումից հետո անցած տարիների ընթացքում ռուսաստանցիները չեն կորցրել միասնական տնտեսական ու քաղաքական տարածության վերամիավորման ձգտումը: