1 րոպեի ընթերցում
ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Բռնցքամարտի Հայաստանի հավաքականի անդամ, Ռիոյի Օլիմպիական խաղերի մասնակից Արամ Ավագյանի կարծիքով պրոֆեսիոնալ ռինգում իր հերթական մրցակիցն աչքի ընկավ համառությամբ:
«Պրոֆեսիոնալ ռինգում այս մենամարտս բաղկացած էր 8 ռաունդից: Մրցակիցս բավականին համառ և կամային որակներով օժտված մարզիկ էր: Ինձ հաջողվեց մրցակցիս կոտրել որովայնին հասցված հարվածների միջոցով, որի շնորհիվ էլ 4-րդ ռաունդում մրցակիցս հրաժարվեց հետագա պայքարից»,-«Արմենպրես»-ի հետ զրույցում ասաց Ավագյանը:
Վերջինիս խոսքով՝ ներկայում նա պատրաստվում է ինչ-որ շրջան հանգստանալ և միայն հաջորդ տարի կսկսի նախապատրաստվել հաջորդ մենամարտին:
Արամ Ավագյանը պրոֆեսիոնալ ռինգում անցկացրեց իր 6-րդ մենամարտը (բոլորը մենամարտերում հաղթանակ): Նա 31-րդ ամառային Օլիմպիական խաղերի մասնակից է և Եվրոպայի առաջնության բրոնզե մեդալակիր: