Սիրիայի ԶՈՒ-ն հերքել է ռազմական գործողություններին ռուսական ցամաքային ուժերի մասնակցության մասին լուրը
2 րոպեի ընթերցում
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիայի զինված ուժերի գլխավոր հրամանատարությունը հերքել է տեղեկությունն այն մասին, որ ռուսական ցամաքային ուժերը սիրիական ուժերի հետ մասնկացում են ռազմական գործողություններին: Ինչպես հաղորդում է«Արմենպրես»-ը, վկայակոչելով սիրիական ՍԱՆԱ գործակալությունը, Սիրիայի զինված ուժերի գլխավոր հրամանատարությանհայտարարության մեջ նշվել է, որ Մոսկվան Սիրիայում տեղակայել է միայն օդային ուժեր, և տարածված տեղեկությունն իրականությանը չի համապատասխանում:
Ռուսաստանի պաշտպանության նախարարությունն իր հերթին հերքել է տեղեկությունն այն մասին, որ Սիրիայում վերջերս ռուս զինվորներ են զոհվել: Ավելի վաղ տեղեկություններ էին տարածվել, որ ռուս երեք զինվորներ են զոհվել և այլոք վիրավորվել Լաթաքիայի իրենց հենակետի վրա ընկած ռումբի պայթյունի հետևանքով:
Ռուսական ուժերը Սիրիայում հարվածներ են հասցնում «Իսլամական պետություն» և այլ ահաբեկչական խմբավորումների թաքստոցներին ու հավաքատեղիներին, ինչպես նաև ղեկավարների նստավայրերին ու զինապահեստներին, ռազմական տեխնիկային ու վարժանքների ճամբարներին:
Ռուսաստանը Սիրիայի Նախագահ Բաշար ալ Ասադի խնդրանքով սեպտեմբերի 30-ին սկսել է հարվածել «Իսլամական պետություն» ահաբեկչական կազմակերպության դիրքերին: Ահաբեկիչների դեմ ռազմական գործողություններում ներառվել են ավելի քան 50 օդանավեր ու ուղղաթիռներ: Բացի այդ, ահաբեկիչների դիրքերը հրթիռակոծվել են ծովից: