1 րոպեի ընթերցում
ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: Պոլսո Հայոց պատրիարքական փոխանորդ Արամ արքեպիսկոպոս Աթեշյանը շաբաթվա վերջին կայցելի Անթիլիաս՝ մասնակցելու Մեծի Տանն Կիլիկիո Հայոց Արամ Ա կաթողիկոսի նախագահությամբ կատարվելիք մյուռոնօրհնեքի արարողությանը: Ինչպես հաղորդում է «Արմենպրես»-ը, այս մասին տեղեկացնում է Ստամբուլի հայկական «Ժամանակ» պարբերականը:
Հայկական պարբերականի ենթադրություններով` Արամ Աթեշյանի ուղևորությունը հետաքրքրություն է ներկայացնում այն տեսանկյունից, որ Անթիլիասի և Պոլսո Հայոց պատրիարքարանի միջև այս շրջանում կան որոշակի չբարձրաձայնված տարաձայնություններ: «Թեպետ երկու կողմն էլ պաշտոնական մակարդակում չի ցանկանում բարձրաձայնել դրանց մասին, սակայն հայտնի է, որ Սիսի կաթողիկոսարանը հետ վերադարձնելու Արամ Առաջինի քայլը Պոլսո Աթոռի կողմից վերապահորեն է ընդունվել: Պոլսո պատրիարքարանի անհանգստությունը մասնավորապես կապված է այն հանգամանքի հետ, որ դատական հայց ներկայացնելուց առաջ Անթիլիասը բացարձակ կապ չի պահպանել իր հետ: Նման իրավիճակում Արամ Առաջինի և Արամ արքեպիսկոպոս Աթեշյանի տեսակցությունը կարող է առիթ դառնալ տվյալ խնդրի արծարծման համար»,-գրում է «Ժամանակը»: