Փաշինյանը դրական է գնահատել Էրդողանի հետ հանդիպումը

Հայաստանի վարչապետ Նիկոլ Փաշինյանը դրական է գնահատել Թուրքիայի նախագահ Ռեջեփ Թայիփ Էրդողանի հետ հանդիպումը, որը տեղի է ունեցել նոյեմբերի 11-ին, Թուրքիայի Անթալիա քաղաքում՝ COP31 համաժողովի շրջանակներում։

«Արմենպրես»-ի փոխանցմամբ՝ Փաշինյանն այդ մասին ասել է TRT World հեռուստաալիքի հետ զրույցում՝ պատասխանելով հարցին, թե ի՞նչ փուլում է Հայաստանի և Թուրքիայի միջև հարաբերությունների կարգավորման գործընթացը։

On sidelines of COP31 in Antalya, speaking to TRT World, Armenian Prime Minister Nikol Pashinyan says normalisation process between Türkiye and Armenia has gained momentum https://t.co/aJT8ZHlgJK

— TRT World Now (@TRTWorldNow) November 11, 2026

«Այսօր մենք շատ դրական հանդիպում ունեցանք նախագահ Էրդողանի հետ, մենք շատ դրական երկխոսություն ունեցանք և ակնկալում ենք առաջիկայում մեր հարաբերությունների զարգացում»,- ասել է Փաշինյանը։

Հարցին, թե կարևորո՞ւմ է Հայաստանի և Թուրքիայի գործընկերությունը տարածաշրջանային փոխկապակցվածության տեսանկյունից, Փաշինյանը դրական պատասխան է տվել.

«Այո, իհարկե, հիմա մենք պետք է վերանորոգենք մեր երկրների միջև երկաթուղին և բացենք։ Մենք աշխատում ենք այդ ուղղությամբ»։

Անթալիայում COP31-ի շրջանակում նոյեմբերի 11-ին տեղի է ունեցել ՀՀ վարչապետ Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը։  ՀՀ վարչապետի աշխատակազմի տարածած հաղորդագրության համաձայն՝ զրուցակիցներն անդրադարձ են կատարել Հայաստան-Թուրքիա հարաբերությունների կարգավորման գործընթացին և ընդգծել են այն առաջ մղելու և տրամաբանական ավարտին հասցնելու կարևորությունը: Այդ առումով, կողմերը կարևորել են մինչ այժմ իրականացված միջոցառումները և ձեռք բերված պայմանավորվածությունները, ինչպես նաև առևտրատնտեսական հարաբերությունների հետագա խթանումը: Մտքեր են փոխանակվել նաև տարածաշրջանային գործընթացների շուրջ: Նիկոլ Փաշինյանը և Ռեջեփ Թայիփ Էրդողանն ընդգծել են Հայաստանի և Ադրբեջանի միջև խաղաղության հաստատման փաստը՝ նշելով, որ այն նոր ազդակ է հաղորդել տարածաշրջանային համագործակցության զարգացմանը։ Անդրադարձ է կատարվել նաև հաղորդուղիների ապաշրջափակմանը, այդ թվում՝ TRIPP նախագծի իրականացմանը միտված քայլերին: