3 րոպեի ընթերցում
ԵՐԵՎԱՆ, 1 ԱՊՐԻԼԻ, ԱՐՄԵՆՊՐԵՍ: Հայաստանի մարմնամարզիկները Քաթարում օրերս կայացած աշխարհի գավաթի փուլային մրցաշարում բացառիկ արդյունք ցույց տվեցին` նվաճելով 3 ոսկե եւ մեկ արծաթե մեդալ:
Ինչպես տեղեկացնում Է«Արմենպրես»-ը, այս մասին ապրիլի 1-ին կայացած իր մամուլի ասուլիսում նշեց ՀՀ վաստակավոր մարզիչ,միջազգային կարգի մրցավար Հակոբ Սերոբյանը:
Նա ասաց, որ նման հաջողությանը նպաստեցին մի քանի գործոններ: Առաջին հերթին մեր թիմի բոլոր մարզիկները՝ Արթուր Դավթյանը, Հարություն Մերդինյանը, Արթուր Թովմասյանը եւ Վահագն Դավթյանը, մինչեւ մրցաշարի մեկնարկը արտակարգ լավ պայմաններում 10- օրյա ուսումնամարզական հավաք անցկացրին Քաթարում: Ի դեպ, քաթարցի մարմնամարզիկների հավաքականի գլխավոր մարզիչն Է հայաստանցի անվանի մարմնամարզիկ Էդուարդ Գեւորգյանը:
Սերոբյանը նշեց, որ հայ մարզիկները լավ մարզավիճակում Էին, եւ ճիշտ ընտրած տակտիկան թույլ տվեց նրանց առավելություն ստանալ մրցակիցների նկատմամբ: Նա շեշտեց, որ Հայաստանի թիմի մարզիչները որոշ չափով բարդացրին մեր մարմնամարզիկների ծրագրերը, բայց բացառելով ռիսկը: Արդյունքում` հայ մարզիկները կարողացան շատ մաքուր կատարել իրենց ելույթները` խուսափելով սխալներից: Արթուր Դավթյանը, Հարություն Մերդինյանը համոզիչ հաղթանակներ տոնեցին բոլոր մրցակիցների նկատմամբ, իսկ Վահագն Դավթյանին ոսկե մեդալ բաժին չհասավ միայն այն պատճառով, որ առաջին տեղը զբաղեցրեց հայաստանցի մեկ այլ մարզիկ՝ Արթուր Թովմասյանը:
Սերոբյանն ասաց, որ մինչեւ Եվրոպայի առաջնությունը Հայաստանի մարմնամարզիկները ազատ են մրցումներից եւ այդ մրցաշարին կնախապատրաստվեն ըստ անհատական ծրագրերի:
Ասուլիսին ներկա Արթուր Դավթյանն ու Մերդինյանն իրենց ուրախությունը հայտնեցին Քաթարում հաջող ելույթների առումով, իսկ Թովմասյանը եւ Վահագն Դավթյանը նշեցին` կարեւորն այն չԷր, թե իրենց երկուսից ո՞վ է մրցաշարի հաղթողը, այլ այն, որ հաղթողը Հայաստանի մարզիկն Էր:
Սերոբյանը նշեց, որ մարմնամարզության աշխարհի գավաթի հաջորդ փուլերը կանցկացվեն Սլովենիայի մայրաքաղաք Լյուբլյանայում եւ Գերմանիայի Շտուտգարտ քաղաքում եւ որ միայն միջազգային մրցումներին հաճախ մասնակցելով հայ մարմնամարզիկները կկարողանան բարձր վարկանիշներ ձեռք բերել: