Հայաստանը Մաքսային միությունից կվերցնի այն, ինչ բխում է իր շահերից. Վյաչեսլավ Կովալենկո

ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ: Մաքսային միությանը միանալու Հայաստանի որոշումը Ռուսաստանում դրական է ընկալվել: Դրական վերաբերմունք ունեցողների բանակը գերազանցում է քաղաքական, տնտեսական եւ հասարակական շրջանակներում: «Հայաստան-Մաքսային միություն. Եվրասիական ինտեգրման հասարակական չափում» թեմայով Երեւան- Մոսկվա տեսակամուրջի ժամանակ այս մասին ասաց Կասպյան համագործակցության ինստիտուտի տարածաշրջանային ծրագրերի տնօրեն, ՀՀ-ում ՌԴ նախկին դեսպան Վյաչեսլավ Կովալենկոն: Նա նշեց, որ Մաքսային միությանն անդամակցելուց հետո Հայաստանը տարեկան 170 միլիոն դոլարի օգուտ կստանա, քանի որ շատ մաքսատուրքերը կվերանան, իսկ ՀՆԱ-ն տարեկան 4,4 տոկոս աճ կգրանցի:

«Եվրոպան անգամ տեսանելի հեռանկարում չի կարողանա Հայաստանին առաջարկել աշխատանքային շուկայի այն պայմանները, որոնք առաջարկում է Ռուսաստանը: Հայաստանը Մաքսային միությունից կվերցնի այն, ինչ բխում է իր շահերից. սա է միության տրամաբանությունը: Հայաստանը պետք է այնպես անի, որ իր սեփական շուկան, անկախ առկա դժվարություններից եւ խնդիրներից, գրավի ու հետաքրքրի ներդրողներին»,- «Արմենպրես»-ի հաղորդմամբ` ասաց Կովալենկոն:

Նշվեց, որ այժմ հայ եւ ռուս փորձագետները մշակում են ճանապարհային քարտեզը` լիրարժեք ներկայացնելու այն հնարավորություններ, որ երկրները կարող են քաղել անդամակցությունից:

Մաքսային միությանը միանալու որոշման մասին ՀՀ Նախագահ Սերժ Սարգսյանը հայտարարել է սեպտեմբերի 3-ին Մոսկվայում ՌԴ Նախագահի հետ հանդիպումից հետո: Հայաստանի ղեկավարն արտահայտել է նաեւ Հայաստանի տրամադրվածությունը Եվրասիական տնտեսական միության ձևավորմանը մասնակցելու վերաբերյալ:Նոյեմբերի 6-ին ՀՀ վարչապետ Տիգրան Սարգսյանը եւ Եվրասիական տնտեսական հանձնաժողովի կոլեգիայի նախագահ Վիկտոր Խրիստենկոն Երեւանում ստորագրել են համագործակցության ամրապնդման հուշագիր, որը կապահովի ՄՄ-ի մարմիններին Հայաստանի բոլոր կառույցների միացումը: