1 րոպեի ընթերցում
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: Վազգեն Սարգսյանի անվան «Հանրապետական» մարզադաշտում տեղի ունեցավ Էդուարդ Մարկարովի ծննդյան 70-ամյակին նվիրված ընկերական հանդիպումը` Հայաստանի եւ Ռուսաստանի ֆուտբոլային վետերանների միջեւ:
Ինչպես փոխանցում է «Արմենպրես»-ը, խաղի մեկնարկից առաջ Մարկարովը Հայաստանի ֆուտբոլի ֆեդերացիայի կողմից արժանացավ պատվոգրի` հայկական ֆուտբոլում ներդրած մեծ ավանդի համար:
Հետո հերթն արդեն ֆուտբոլային խաղինն էր: Խաղը մեկնարկեց խորհրդանշական հարվածով` ավագ Մարկարովը գնդակ փոխանցեց կրտսեր Մարկարովին:
Ամեն ինչ ինչպես հին ու բարի ժամանակներում էր. ավագի թեւկապով Զանազանյանն էր, դարպասին` Ալյոշա Աբրահամյանը, իսկ հարձակման կրակագծում հայկական ֆուտբոլի լեգենդներից մեկը` Էդուարդ Մարկարովը:
Ինչպես եւ սպասվում էր, հանդիպումը լի էր գոլերով: 7-7 ավարտված այս խաղում իր տոնական գոլը խփեց նաեւ «Արարատ 73» լավագույն ռմբարկուներից մեկը եւ օրվա հոբելյարը` Էդուարդ Մարկարովը: