2 րոպեի ընթերցում
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: Հայաստանի կառավարությունը հստակ գիտակցում է, որ երկրում առկա են մի շարք հիմնախնդիրներ։ Ինչպես փոխանցում է «Արմենպրես»-ը, այս մասին Ազգային ժողովում կառավարության ծրագրը ներկայացնելիս հայտարարեց ՀՀ վարչապետ Տիգրան Սարգսյանը:«Մենք մշտապես եղել ենք բաց և թափանցիկ, ընդունել ենք արդարացի քննադատությունը, ինքներս ենք բացահայտել շատ խնդիրներ»,- շեշտեց կառավարության ղեկավարը:Տիգրան Սարգսյանն ընդգծեց, որ մեզ մոտ առկա է որակյալ աշխատատեղերի սակավություն, իսկ արտագաղթը և աղքատությունը շարունակում են մնալ առաջնային լուծում պահանջող խնդիրներ:
Որպես հաջորդ առաջնային խնդիր գործադիրի ղեկավարը նշեց, որ մեզ դեռևս չի հաջողվել ամբողջությամբ արմատախիլ անել կոռուպցիան, ստեղծել տնտեսավարողների համար մրցակցային հավասար պայմաններ։Տնտեսության մեջ գերիշխող դիրքի չարաշահումը շարունակում է մնալ հաճախ հանդիպող երևույթ: Դեռևս ցածր է հասարակության վստահությունը դատաիրավական համակարգի նկատմամբ։
«Կառավարության ծրագիրը նպատակ ունի լուծելու այս խնդիրները։ Այս պայմաններում մեզ անհրաժեշտ է բեկումնային զարգացում: Զարգացում, որի հիմնական գրավականը լինելու է մեր սեփական ուժերին ապավինելը և ներքին ռեսուրսների մոբիլիզացիան»,- ընդգծեց ՀՀ վարչապետը։Նա նաև շեշտեց, որ հենց այս խնդիրներից են բխում կառավարության ծրագրի երեք հիմնական առաջնահերթությունները՝ տնտեսության մրցունակության բարձրացում, մարդկային կապիտալի զարգացում և ինստիտուցիոնալ կարողությունների զարգացում: