Բուլղարիայի խորհրդարանի և Եվրախորհրդարանի պատգամավորները Սոֆիայում քննարկել են երկրի ներկա վիճակն ու ապագան․ BTA
3 րոպեի ընթերցում
Հոդվածը հրապարակվում է «Արմենպրես»-ի և BTA-ի միջև ստորագրված համաձայնագրի շրջանակում։
Եվրոխորհրդարանի և Բուլղարիայի ազգային ժողովի անդամները «Եվրոպական քաղաքացիների նախաձեռնության» (ECI) շրջանակներում Սոֆիայում քննարկում են սկսել՝ նվիրված Բուլղարիայի ներկա վիճակին և ապագային։ «Արմենպրես»-ի փոխանցմամբ՝ այս մասին հաղորդում է Բուլղարիայի ազգային լրատվական գործակալությունը (BTA)։
Միջոցառումը կազմակերպվել է Եվրոպական տնտեսական և սոցիալական կոմիտեի՝ «Եվրոպական քաղաքացիների նախաձեռնության» հարցերով զբաղվող խմբի կողմից, Բուլղարիայի տնտեսական ու սոցիալական խորհրդի (ՏՍԽ) և Բուլղարիայի առևտրաարդյունաբերական պալատի (ԲԱԱՊ) աջակցությամբ։
Բուլղարիայում Եվրոպական հանձնաժողովի ներկայացուցչության ղեկավար Յորդանկա Չոբանովան նշել է, որ 1990-ականներին բնորոշ լայն հանրային կոնսենսուսի դարաշրջանն ավարտվել է, և հաստատությունների հանդեպ հանրային վստահությունը պահպանելու համար ուղիղ երկխոսությունն ավելի կարևոր է դառնում։
Նա կարևորել է ECI-ի ճանաչելիության բարձրացումը Բուլղարիայում՝ ընդգծելով, որ ECI-ի հաջողված նախաձեռնություններում Բուլղարիայի ներդրումը նշանակալի է և համադրելի Ավստրիայի ու Շվեդիայի ցուցանիշների հետ։
«Առաջադեմ Բուլղարիա» խորհրդարանական խմբի պատգամավոր Սվետլա Կոջաբաշևան նշել է, որ Բուլղարիայի քաղաքացիներն ունեն գաղափարներ ու փորձ և արժանի են մասնակցելու որոշումների համատեղ կայացմանը։
ԲԱԱՊ-ի նախագահ Ցվետան Սիմեոնովն իր հերթին նշել է, որ միջոցառումը հնարավորություն է տալիս ավելի ակտիվ քայլեր ձեռնարկել քաղաքացիական հասարակությանը Եվրոպական միության շրջանակներում տեղի ունեցող զարգացումներին ներգրավելու ուղղությամբ։ Նա հավելել է, որ քաղաքացիական հասարակությունն ամենաշատն է տուժում վարչակազմի գործողություններից և կանոնակարգերի ներդրումից, քանի որ այն պետք է հարմարվի վարչակազմի վարքագծին։
Սիմեոնովի խոսքով՝ Եվրոպական առևտրի և արդյունաբերության պալատների ասոցիացիայի միջոցով ԲԱԱՊ-ը նկատում է զգալիորեն աճող ակտիվություն և արագ արձագանք տնտեսությանը վերաբերող ցանկացած նախաձեռնության նկատմամբ։