1 րոպեի ընթերցում
Երևանի և Ախուրյան համայնքի համագործակցության շրջանակներում Ախուրյանում հիմնանորոգվում և բարեկարգվում է Ջրաշինարարների թաղամասի «Եռանկյունի» այգին։ Ծրագրի շրջանակում նախատեսվում է շուրջ 3000 քառակուսի մետր տարածք վերածել ժամանակակից և հարմարավետ հանրային միջավայրի։ Ծրագրի իրականացման համար Երևանի համայնքապետարանը հատկացրել է 30 մլն դրամ, իսկ Ախուրյանի համայնքը՝ ևս 15 մլն դրամ։
Աշխատանքների շրջանակում նախատեսվում է կառուցել շատրվաններ և ցայտաղբյուր, իրականացնել տարածքի սալապատում և կանաչապատում, տեղադրել խաղասարքեր և նոր լուսավորության համակարգ։ Կկառուցվեն նաև ջրահեռացման և ջրամատակարարման նոր համակարգեր։ Ծրագրով նախատեսվում է նաև տարածքի ասֆալտապատում և հարակից շենքի շրջակայքի բարեկարգում։
Ծրագրի նպատակն է ձևավորել նոր որակի հանրային միջավայր՝ բնակիչների հանգստի, ժամանցի և շփման համար։
Ինչպես «Արմենպրես»-ը տեղեկանում է Ախուրյանի համայնքապետարանից, ծրագրի նախաձեռնությունը ամիսներ առաջ ներկայացրել էր համայնքի ղեկավար Զավեն Մանուկյանը՝ Երևանի քաղաքապետարանին առաջարկելով աջակցել այգու հիմնանորոգմանը։ Նախաձեռնությունը հավանության է արժանացել Երևանի ավագանու կողմից։