1 րոպեի ընթերցում
Շիրակի մարզի Ախուրյան համայնքի ավագանին հուլիսի 31-ին կայացած արտահերթ նիստում ընդունել է սոցիալական կարևոր նշանակություն ունեցող որոշում։ Ինչպես «Արմենպրես»-ը տեղեկանում է Ախուրյանի համայնքապետարանից, համայնքի ղեկավար Զավեն Մանուկյանի նախաձեռնությամբ համայնքի ավագանին հաստատել է նախագիծ, որի համաձայն՝ համայնքի ենթակայության ներքո գործող բոլոր նախադպրոցական ուսումնական հաստատություններում երեխաների կրթությունն այսուհետ կլինի ամբողջությամբ անվճար։
Համայնքապետարանի գնահատմամբ՝ նախաձեռնությունը նպատակ ունի էապես թեթևացնել համայնքի բնակիչների սոցիալական բեռը և ապահովել որակյալ նախադպրոցական կրթության հավասար հասանելիություն բոլոր ընտանիքների համար՝ անկախ նրանց սոցիալական վիճակից։
«Սա կարևոր քայլ է մեր համայնքի ապագայի՝ մեր երեխաների համար հավասար և բարենպաստ պայմաններ ստեղծելու ճանապարհին»,-նշել են Ախուրյանի համայնքապետարանից՝ հավելելով, որ ծրագրի իրականացումը հնարավոր է դարձել պետական դոտացիայի ավելացման շնորհիվ։
Ախուրյան համայնքի հաշվեկշռում ներկայում գործում է 22 մանկապարտեզ։