Թրամփը վստահ չէ Կիևին Patriot համակարգերի համար հրթիռներ արտադրելու լիցենզիա տալու հարցում
1 րոպեի ընթերցում
ԱՄՆ-ի նախագահ Դոնալդ Թրամփը հայտարարել է, որ վստահ չէ, թե արդյոք Միացյալ Նահանգներն Ուկրաինային լիցենզիա կտա Patriot համակարգերի համար հակահրթիռներ արտադրելու համար։
«Մենք դիտարկում ենք այդ հարցը»,-«Արմենպրես»-ի հաղորդմամբ՝ Թրամփն ասել է Financial Times թերթին տված հարցազրույցում։
Նա հավելել է, որ դա «շատ արտասովոր զենք» է, և պետք է զգույշ լինել այն հարցում, թե ում է ԱՄՆ-ը «լիցենզիա տալիս»։
«Մենք լիցենզիաներ չենք բաժանում այդպիսի տեխնիկայի համար», - նշել է Թրամփը։
ԱՄՆ-ի նախագահը հայտարարել է, որ իր ուշադրության կենտրոնում ռուս-ուկրաինական հակամարտության դադարեցումն է։
Նա հաստատել է, որ իր երկու պատվիրակները՝ իր փեսան՝ Ջարեդ Քուշները և հատուկ դեսպանորդ Սթիվ Ուիթքոֆը, առաջիկա օրերին իրենց առաջին այցը կկատարեն Ուկրաինա։
«Պարզ ասած՝ մենք ցանկանում ենք, որ Ուկրաինայի և Ռուսաստանի պատերազմն ավարտվի: Մենք հետաքրքրված չենք հրթիռներով, մենք հետաքրքրված ենք խաղաղությամբ», - ասել է ԱՄՆ նախագահը: