3 րոպեի ընթերցում
Աշոցք համայնքում նախօրեին հանդիսավորությամբ նշվել է համայնքի օրը, որը կրել է «Մեկ ընտանիք, մեկ բերդ» խորագիրը։ Ինչպես տեղեկացնում է «Արմենպրես»-ը, տոնական միջոցառումների մեկնարկից առաջ Շիրակի մարզպետ Դավիթ Առուշանյանը, հյուրերը և Աշոցք համայնքի ղեկավար Կարեն Մանուկյանը Աշոցքի պուրակում հարգանքի տուրք են մատուցել և ծաղիկներ խոնարհել հայրենիքի համար հերոսացած քաջորդիների հիշատակը հավերժացնող հուշատախտակի մոտ։
Տոնական օրվա առթիվ Շիրակի մարզպետը շնորհավորել է Աշոցքի բնակիչներին՝ ընդգծելով, որ օրը հրաշալի առիթ է ևս մեկ անգամ արժևորելու Աշոցքի ավանդույթներն ու այն մարդկանց, ովքեր իրենց աշխատասիրությամբ, նվիրումով և հայրենասիրությամբ կերտում են համայնքի ներկան ու ապագան։
«Ուրախալի է, որ տոնակատարությունն անցկացվում է «Մեկ ընտանիք, մեկ բերդ» խորագրի ներքո։ Այս խորագիրը խորհրդանշում է մեր միասնականությունը, ընտանեկան արժեքների ամրությունը, ազգային ինքնության պահպանման կարևորությունը և այն ուժը, որը մենք ստանում ենք համախմբված լինելու շնորհիվ։ Վստահ եմ, որ այսօր Աշոցքի հյուրընկալ հարկի տակ միավորվելու են ավանդույթները, մշակույթը, ազգային արժեքներն ու ընտանեկան ջերմությունը՝ ստեղծելով իսկական տոնական մթնոլորտ»,- նշել է մարզպետը։ Դավիթ Առուշանյանն իր խոսքում անդրադարձել է նաև համայնքային զարգացման ծրագրերին՝ փաստելով, որ վերջին տարիներին ակնհայտորեն զգացվում է հոգատար և հետևողական վերաբերմունք Աշոցքի խնդիրների նկատմամբ.
«Քայլ առ քայլ, Կառավարության հետ համագործակցությամբ, իրականացվում են կարևոր ծրագրեր, նորոգվում և կառուցվում են ճանապարհներ, զարգանում են ենթակառուցվածքները, կյանքի են կոչվում նախաձեռնություններ, որոնք միտված են համայնքի բնակիչների կյանքի որակի բարելավմանը։ Սա շարունակական աշխատանքի արդյունք է, որն արդեն տալիս է տեսանելի պտուղները և վստահություն ներշնչում վաղվա օրվա նկատմամբ»։
Մարզպետը համոզմունք է հայտնել, որ միասնական աշխատանքի, փոխվստահության և նվիրվածության շնորհիվ համայնքը շարունակելու է զարգանալ և հաղթահարել առկա մարտահրավերները։ Նա բարեկեցություն, անսպառ ուժ, լավատեսություն ու խաղաղություն է մաղթել աշոցքցիներին, իսկ համայնքին՝ կայուն զարգացում և նոր հաջողություններ։ Միջոցառման շրջանակում ներկաները շրջել են համայնքի 25 բնակավայրերը ներկայացնող տաղավարներով, ծանոթացել ժողովրդական արվեստի, ազգային խոհանոցի ամենահետաքրքիր ավանդույթներին, ինչպես նաև ներկայացված ցուցահանդեսին։
«Մեկ ընտանիք, մեկ բերդ» խորագրով տոնակատարությունը եզրափակվել է տոնական մեծ համերգային ծրագրով։