1 րոպեի ընթերցում
Գեղարքունիքի մարզի Մարտունի քաղաքում, Գևորգ Զիրոյան փողոցում գտնվող նախկին ատամնաբուժարանի շենքի տարածքում, հիմնվում է արդի չափորոշիչներին համապատասխան Երիտասարդական կենտրոն, որի շինարարական աշխատանքներն ընթանում են 2026 թվականի ապրիլից։
Ինչպես «Արմենպրես»-ին տեղեկացրին Մարտունիի համայնքապետարանի աշխատակազմից, ծրագիրն իրականացվում է Գերմանական միջազգային համագործակցության ընկերության հետ համագործակցությամբ։ Ծրագրի պայմանագրային արժեքը կազմում է շուրջ 52 միլիոն դրամ, որից 30 միլիոն դրամը հատկացրել է Գերմանիայի միջազգային համագործակցության ընկերությունը, 22 միլիոն դրամը՝ Մարտունիի համայնքապետարանը։ Շենքը հիմնանորոգվում է 162 քմ տարածքում, որից հետո կահավորվելու և ապահովվելու է արդի չափորոշիչներին համապատասխան բոլոր պայմաններով։ Աշխատանքները նախատեսվում է ավարտել օգոստոսին։
«Սա երկար սպասված ու կարևոր ձեռնարկ էր, որի արդյունքում, վերջապես, Մարտունի համայնքի երիտասարդությունը կունենա միջոցառումների, հանդիպումների, քննարկումների, ազատ ժամանցի համար բավարարող բոլոր պայմաններն ու հնարավորությունները»,-ներկայացրին Մարտունիի համայնքապետարանի աշխատակազմից։