2 րոպեի ընթերցում
Համագործակցության նպատակով Գեղարքունիքի մարզի Վարդենիս համայնքում հյուրընկալվել են Էստոնիայի Հանրապետության Վալգա քաղաքի ուսումնական հաստատության ներկայացուցիչները։
Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, էստոնիայի ներկայացուցիչները հյուրընկալվել են Վարդենիս քաղաքի Բադեյան պետական քոլեջում։
Վարդենիս համայնքի ղեկավար Ահարոն Խաչատրյանն ընդունել է Վարդենիսի Բադեյան պետական քոլեջի տնօրեն Արթուր Սիրադեղյանին, քոլեջի վարչական աշխատակիցներին և Էստոնիայի Հանրապետության Վալգա քաղաքի ուսումնական հաստատության ներկայացուցիչներին։
Հանդիպման ընթացքում քննարկվել են կրթության ոլորտում համագործակցության զարգացման, փորձի փոխանակման, ուսումնական ծրագրերի կատարելագործման և միջազգային կապերի ընդլայնմանն առնչվող հարցեր։ Կողմերը կարևորել են կրթական հաստատությունների միջև գործընկերային հարաբերությունների ամրապնդումը, ինչը կնպաստի ուսանողների և դասախոսական կազմի մասնագիտական կարողությունների զարգացմանը։
Համայնքի ղեկավարը ողջունել է հյուրերին՝ ընդգծելով միջազգային համագործակցության կարևորությունը կրթության և համայնքի զարգացման գործում։ Նա պատրաստակամություն է հայտնել աջակցելու կրթական նախաձեռնություններին և ծրագրերին, որոնք միտված են երիտասարդների գիտելիքների ու հմտությունների զարգացմանը։
Հանդիպումն անցել է ջերմ և կառուցողական մթնոլորտում՝ նախանշելով հետագա համագործակցության նոր հնարավորությունները։